Ռազմական դրության անցման իսկ պահից մենք լայն սպառում ունեցող պարենային և ոչ պարենային 31 ապրանքային խմբերի մշտադիտարկում ենք իրականացնում՝ շուրջ 94 ապրանքատեսակներ:  Այս մասին այսօր ՀՀ Ազգային ժողովի տնտեսական հարցերի ու ֆինանսավարկային և բյուջետային հարցերի մշտական հանձնաժողովների նիստին ասաց Տնտեսական մրցակցության պետական հանձնաժողովի նախագահ Գեղամ Գևորգյանը:

Նա նկատեց, որ մամուլում հրապարակումներ են եղել, որոշ ապրանքների մասին գների բարձրացումներ կան՝ ձեթ, շաքարավազ, ալյուր, կարագ և դիտարկել է խոշոր տնտեսվարող սուբյեկտների վարքագիծը: «Բոլորի պարագայում ներմուծման և ձեռքբերման փաստաղթղթերը մեզ տրամադրել են, հիմնականում դրսից ներկրվող ապրանքներն են թանկացել՝ ձեռքբերման գնի և արտաժույթի կուրսի տատանման հետ կապված: Այդ թվերը համադրում ենք: Այս պահին տնտեսվարող սուբյետների կողմից որևէ բացասական վարքագիծ չենք նկատել»,-ասաց նա, իսկ ձվի թանկացման մասին ասաց, որ դիտարկում են դեռ և հիմնականում ասում են հավի կերի թանկացման հետ է կապված, բայց կստուգեն:

Գեղամ Գևորգյանը անդրադարձավ ծաղիկների թանկացմանը և նշեց, որ այս ոլորտում խոշոր տնտեսվարող սուբյեկտների մասին չի կարելի խոսել: «Թե պատճառը որն էր, թույլ տվեք այդ ամենի մեջ չմտնել, բայց ՊԵԿ-ի, ոստիկանության և էկոնոմիկայի մեր գործընկերների հետ խոշոր մեծածախ վաճառք իրականացնող ծաղկի շուկաներ այցելեցինք, խոսեցինք վաճառողների հետ և  փոխադարձ համաձայնությամբ խնդրեցինք գները նախ փակցնել: Գները էականորեն իջան և  բացի այդ, արտահանողներին խնդրեցինք, որ ծաղկի պակաս չլինի, ներքին շուկայում սպառեն և շնորհակալ ենք նրանց, որ միանագամից արձագանքեցին»,-ասաց նա:

Անդրադառնալով զինվորական հագուստնեի թանկացման հարցին, որի համար ԱԺ երկու պատգամավոր է դիմել,  ՏՄՊՊՀ նախագահն ասաց, որ մասնագիտացված խանութները ուսումնասիրել են և հավաստիացրեց, որ այն ժամանակ էլ, հիմա էլ որևէ մասնագիտացված խանութում չի եղել զինվորական հագուստի գների թանկացում: Ինչ վերաբերում է  վերավաճառք կատարող անձանց, նա ասաց, որ նրանց նկատմամբ վեհահսկողություն չեն կարող իրականացնել և նրանց զսպելու համար հրապարակել են զինվորական հագուստի գները:

Քովիդ թեստերի գների հետ կապված՝ Գեղամ Գևորգյանը նշեց, որ դիմել են լաբորատոր ծառայություն մատուցող ընկերություններին և խնդրել են թեստի գինը սահանել 15 հազար դրամ, որի մեջ չի մտնում տնային այցեր, հավելյալ ծառայությունները: Հարցին, թե որքանով արդարացի է այդ գները Գեղամ Գևորգյանն ասաց, որ այդ հարցին չի կարող պատասխանել: «Եթե վերցնենք բենզին տրամաբանությունը՝ արդարացի է այն գինը, որը առաջարկվում է և այն գինը, որ վճարում են մարդիկ: Այստեղ չկա գերիշխող դիրք ունեցող սուբյեկտ»,-ասաց նա և նշեց, որ համեմատական են անցկացրել մի շարք երկրների հետ և Հայաստանում էականորեն ավելի էժան են թեստերի գները և կան տնտեսվարող սուբյեկտներ, որ տասը հազար դրամով են մատուցում այդ ծառայությունը: