«Յուրաքանչյուր ռազմական գործողություն ազդեցություն է թողնում երկրի տնտեսության եւ, հատկապես, ֆինանսական համակարգի վրա: Եվ, սովորաբար, արժեզրկվում է տվյալ երկրի ազգային արժույթը, քանի որ պատերազմական իրավիճակում կրճատվում են ներդրումները, արտահանման ծավալներն են որոշակի սահմանափակվում, կապիտալի արտահոսք է նկատվում եւ այլն եւ այլն: Բայց այդ ազդեցությունը այս կամ այն կերպ  կարելի է մեղմել՝ հաշվի առնելով տվյալ երկրի առանձնահատկությունը:

Հայաստանի պարագայում այս պահի դրությամբ կարող ենք ֆիքսել՝ պատերազմական այս օրերին մեր ֆինանսական համակարգը կայուն է, որովհետեւ երկրի բանկային համակարգը բավականին կայունացնող էֆեկտ  է թողնում ֆինանսական հատվածի վրա: Տնտեսագետ Սուրեն Պարսյանի խոսքերով՝ մեր բանկային համակարգը կայուն է, ունի բավականին լուրջ տնտեսական անվտանգության երաշխիքներ, ակտիվների մեծ մասը լիկվիդային է, եւ դա, բնականաբար, իր ազդեցությունն է թողնում ֆինանսական ոլորտի վրա…
Այս իրավիճակում կայունության առումով էական նշանակություն է ունեցել նաեւ դրսից տարբեր տրանսֆերտների հոսքը՝ դեպի «Հայաստան» համահայկական հիմնադրամ կամ անձնական տիրույթ: Այս ամենից զատ՝ Կենտրոնական բանկն է որոշակի ներարկումներ արել այս ընթացքում:  
Ֆինանսական համակարգի կայունությունն, անշուշտ, լավ է՝ տարիների հսկայածավալ աշխատանքի արդյունք, այնպիսի, որ նույնիսկ պատերազմական այս օրերին չխաթարվեց: Բայց հարկ է հաշվի առնել, որ, աստված մի արասցե, պատերազմը ձգձգվել կարող է: Երկարաժամկետ հատվածում կայունության համար ի՞նչ է պետք անել»:

Արմենուհի ՄԵԼՔՈՆՅԱՆ

Նյութն ամբողջությամբ կարդացեք «Հայաստանի Հանրապետության» թերթի այսօրվա համարում: