Ավստրիայի իշխանությունները, Վիեննայում տեղի ունեցած ահաբեկչությունից հետո, մտադիր են փակել արմատական մզկիթները
Ավստրիայի ներքին գործերի նախարար Կարլ Նեհամմերը և ինտեգրացման հարցերով նախարար Սյուզաննե Ռաաբը Վիեննայում տեղի ունեցած ահաբեկչությունից հետո հայտարարել են «արմատական մզկիթները» փակելու մտադրության մասին։ Այս մասին հայտնում է ավստրիական APA գործակալությունը։ Ըստ պարբերականի տեղեկությունների՝ այսպիսի որոշում է կայացվել Ավստրիայի իսլամական համայնքի ղեկավար Ումիթ Վուրալի հետ հանդիպումից հետո։
«Խոսքը գնում է կազմակերպությանը իրավական կարգավիճակից զրկելու և լուծարելու մասին»,- մանրամասնում է գործակալությունը։
Ավստրիայի ինտեգրացման հարցերով նախարար Սյուզաննե Ռաաբը նշել է, որ արմատական մզկիթների փակումը ոչ թե հարձակում է կրոնի վրա, այլ պայքար է անջատողականության դեմ։
«Ինձ համար կարևոր է արձանագրել, որ այս ամենը հարձակում չէ կրոնի վրա, այլ պայքար է անջատողականության դեմ։ Սա հարձակում չէ կրոնական կազմակերպության անդամների վրա, այլ պայքար է արմատականության նպատակներով կրոնի չարաշահման դեմ»,- ասել է Սյուզաննե Ռաաբը։
Հիշեցնենք, անցած երկուշաբթի Վիեննայի կենտրոնում մի քանի զինված հարձակումներ էին տեղի ունեցել։ Ավստրիայի իշխանությունները կատարվածն ահաբեկչություն են որակել։ Հարձակվողներից մեկը սպանվել է։ Նա, ըստ Ավստրիայի իրավապահների, հարում է «Իսլամական պետություն» ահաբեկչական կազմակերպությանը։ Ոստիկանությունը փնտրում է նրա հնարավոր հանցակիցներին։ Հարձակումների հետևանքով սպանվել է 5 մարդ։
