ՀՀ Ազգային ժողովի «Բարգավաճ Հայաստան» խմբակցության պատգամավորներ Միքայել Մելքումյանն ու Շաքե Իսայանն առաջարկում են Զինծառայողների ապահովագրության հիմնադրամին հատկացվող դրոշմանիշային վճարների վճարման համահարթ եղանակից անցում կատարել պրոգրեսիվ համակարգի, ինչը թույլ կտա զգալի չափով ավելացնել հավաքագրվող դրամական միջոցները:

Պատգամավորներն առաջարկում են մինչեւ 150 հազար դրամ հարկման բազայի դեպքում 1000 դրամ դրոշմանիշային վճարը թողնել անփոփոխ, 150 հազարից 300 հազար դրամ հարկման բազայի դեպքում 2000 դրամ, 300 հազարից 500 հազար դրամ հարկման բազայի դեպքում՝ 3000 դրամ, 500 հազարից 1 միլիոն դրամ հարկման բազայի դեպքում՝ 6000 դրամ, 1 միլիոն դրամից ավելի հարկման բազայի դեպքում՝ 12 հազար դրամ: Անհատ ձեռնարկատերերը եւ նոտարները 12 հազար դրամ են պարտավորվում վճարել յուրաքանչյուր տարի։

Նախագծի հիմնավորման մեջ նշվում է, որ ստեղծված պատերազմական իրավիճակում կտրուկ ընդլայնվելու է հիմնադրամի շահառուների շրջանակը, եւ հատուցումների պատշաճ տրամադրման համար անհրաժեշտ է լինելու զգալի չափով հավելյալ ֆինանսական ռեսուրսներ ներգրավել:

Նախագծի ընդունման արդյունքում ակնկալվում է, որ դրոշմանիշային վճարների պրոգրեսիվ եղանակով վճարման արդյունքում զգալի չափով կավելանան Զինծառայողների ապահովագրության հիմնադրամի ֆինանսական ռեսուրսները, ինչն էլ ստեղծված պայմաններում կնպաստի Հիմնադրամի կողմից ստանձնած պարտավորությունների եւ նպատակների պատշաճ իրագործմանը: