Վրաստանի պետանվտանգության ծառայությունը քրեական գործ է հարուցել խորհրդարանական ընտրություններից առաջ իշխանությունը տապալելու ծրագրեր մշակելու կապակցությամբ: Այս մասին ասված է ծառայության տարածած հայտարարության մեջ, գրում է ՏԱՍՍ գործակալությունը։

«Հետաքննությունն սկսելու համար հիմք է ծառայել պետանվտանգության դեպարտամենտի կողմից ստացված օպերատիվ տեղեկատվությունը, որի համաձայն՝ կոնկրետ անձինք, խորհրդարանական ընտրություններում իրենց համար անցանկալի արդյունքի դեպքում, ծրագրում էին կառավարության ուժային տապալումը», - ասված է հայտարարության մեջ։

Պետանվտանգության ծառայությունում հայտնել են, որ այս գործի շրջանակներում արդեն հարցաքննվել է մի քանի մարդ։ Քրեական գործ է հարուցվել «դավադրություն՝ սահմանադրական կարգը բռնի փոխելու, Վրաստանի պետական իշխանությունը տապալելու կամ զավթելու նպատակով» հոդվածով, որը ենթադրում է հինգից ութ տարի ժամկետով ազատազրկում։

Հիշեցնենք, որ Վրաստանում հոկտեմբերի 31-ին կայացել են խորհրդարանական ընտրություններ։