Twitter սոցիալական ցանցը ԱՄՆ նախագահական ընտրություններում Բայդենի հաղթանակի մասին «Դեմոկրատական կոալիցիա՝ ընդդեմ Թրամփի» դեմոկրատների կազմակերպության համահիմնադիր Սքոթ Դվորկինի հաղորդագրությունը մակնշել է որպես վաղաժամ: Այս մասին գրում է РИА Новости-ն:

«Ընտրված նախագահը Ջո Բայդենն է: Ընտրված փոխնախագահը Քամալա Հարրիսը»,- գրել է Դվորկինը:

Ավելի ուշ սոցիալական ցանցն այդ հրապարակումը մակնշել է որպես վաղաժամ, քանի որ «պաշտոնական աղբյուրները կարող էին չհայտնել ընտրությունների արդյունքները, երբ հաղորդագրությունը հրապարակվել է Twitter-ում»:

Հիշեցնենք, որ նոյեմբերի 3-ին ԱՄՆ-ում կայացել են նախագահի ընտրություններ, որոնցում երկրի գործող նախագահ Դոնալդ Թրամփի մրցակիցը դեմոկրատական կուսակցության ներկայացուցիչ, երկրի նախկին փոխնախագահ Ջո Բայդենն է:

Բայդենը նաև ստացել է ընտրիչի 264, իսկ գործող նախագահ Դոնալդ Թրամփը՝ 214 ձայն։ Հաղթանակի համար հարկավոր է հավաքել ընտրիչների 270 ձայն։

Քվեարկության արդյունքները դեռ չեն ամփոփվել, սակայն ավելի վաղ գործող նախագահ Դոնալդ Թրամփը խոստացել էր հանդես գալ հայտարարությամբ և հայտարարել ընտրություններում հաղթանակի մասին: Բացի այդ, գործող նախագահն ասել էր, որ ինքն արդեն հաղթել է: Թրամփը նաև նշել էր, որ դեմոկրատները փորձում են «գողանալ իր հաղթանակը»։