Մամուլում տեղեկություններ էին հայտնվել այն մասին, որ ԱԺ-ն երկուշաբթի օրը խորհրդի նիստ, ապա արտահերթ նիստ է պլանավորում: Նշվում էր, որ «Իմ Քայլ» -ի պատգամավորների նախաձեռնությամբ մի նոր նախագիծ է դրվել շրջանառության մեջ, որով մամուլին և ընդդիմադիրներին ռազմական դրության մասին օրենքով պաշտոնական տեղեկատվությունից դուրս որևէ հրապարակման դեպքում ոչ թե վարչական տուգանքների կենթարկեն, այլ՝ քրեական հետապնդման։

Այս տեղեկությունը Hraparak.am-ի հետ զրույցում հաստատել էր «Լուսավոր Հայաստան» խմբակցության պատգամավոր Անի Սամսոնյանը։

Analitik.am-ը նախագծի հետ կապված զրուցեց ՀՀ ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Նաիրա Զոհրաբյանի հետ։

Մեր այն հարցին, որ մամուլում տեղեկություն կա, որ ԱԺ-ում նախագիծ է դրվելու շրջանառության մեջ՝ ռազմական դրության ժամանակ կարծիք ունենալը քրեականացնելու վերաբերյալ, ինչը հաստատել է ԼՀԿ խմբակցությունից Անի Սամսոնյանը, Նաիրա Զոհրաբյանը պատասխանեց․ «Անկեղծ, ես չեմ ուզում հավատալ, որ նման բան հնարավոր է, և ես կփորձեմ «Լուսավոր Հայաստան»-ի իմ գործընկերներից ճշտել, թե որքանով է այս աբսուրդը հավաստի։

Ես կարծում եմ, որ եթե փորձ արվի այդպիսի բան անել՝ այսինքն մարդուն զրկեն սեփական կարծիքն ունենալու իրավունքից, մարդուն զրկեն ճշմարտությունն ասելու իրավունքից միայն նրա համար, որ դա ինչ-որ մի քաղաքական խմբի քաղաքական շահերը պիտի ոտնահարի, ես կարծում եմ՝ այստեղ մենք, որևէ մեկս չպիտի լռենք»։

Տիկին Զոհրաբյանը նշեց, որ սա արդեն մարդու սահմանադրական իրավունքի կոպտագույն ոտնահարում է․ «Որպես Եվրոպայի Խորհրդի Խորհրդարանական վեհաժողովի պատգամավոր՝ ես անպայմանորեն այս հարցը, եթե իհարկե նման աբսուրդ տեղի ունենա, բարձրացնելու եմ միջազգային կառույցների առջև։

Ո՞ւր ենք հասել՝ այսինքն մեզ զրկում են սեփական կարծիքն ունենալու իրավունքից և սեփական կարծիք ունենալու դեպքում սպառնում են քրեական պատասխանատվությամբ, տարեք միանգամից գնդակահարեք, ինչի՞ եք քրեական պատասխանատվության ենթարկում»։

Նաիրա Զոհրաբյանն ընդգծեց, որ չի ցանկանում հավատալ, թե մամուլում հրապարակվածն իրականություն է․ «Ես ուզում եմ հավատալ, որ մամուլում հրապարակվածն իրականության մեջ տեղ չի ունենա, եթե անգամ ինչ-որ քաղաքական խմբիկների ուղեղում նման գաղափարներ են ծագել, բնում կխեղդեն իրենք նման հակասահմանադրական ցանկությունները և Հայաստանը չեն տրորի հակաժողովրդավարական ճահիճի մեջ»։

Օֆելի Իսրայելյան