Ֆրանսիայի նախագահ Էմանուել Մակրոնն առաջարկել է աշխատել ԼՂ-ի «երկարաժամկետ քաղաքական կարգավորման» շուրջ, որը «կպաշտպանի Հայաստանի շահերը» և «վճռականորեն պարտադրել Թուրքիային դադարեցնել սադրանքները» այս հակամարտությունում:

«Անհապաղ պետք է աշխատանքներ տանել հակամարտության երկարաժամկետ քաղաքական կարգավորման պարամետրերի հստակեցման ուղղությամբ, որը կարող է երաշխավորել Լեռնային Ղարաբաղի հայերի համար բարենպաստ պայմաններ և տասնյակ հազարավոր մարդկանց վերադարձը, որոնք գաղթել էին իրենց բնակավայրերից»,- ասված է Ելիսեյան պալատի հայտարարության մեջ:

Հաղորդագրության մեջ նշված է, որ այս դժվարին պահին Ֆրանսիան Հայաստանի կողքին է: Միաժամանակ Մակրոնը նշել է, որ անհրաժեշտ է հասնել ռազմական գործողությունների լիարժեք դադարեցման ու կրակի դադարեցման պահպանման: