Ես որոշել էի պատերազմից վերադառնալուց հետո չխոսել, սակայն խոսում եմ, քանի որ չէի սպասում՝ Ազատության հրապարակում այսքան քիչ մարդ է լինելու Արցախը կորցնելուց հետո: Զարթնեք հայ ժողովուրդ: Այս մասին Ազատության հրապարակում հայտարարեց բժիշկ Տարոն Տոնոյանը, ով նոր-նոր է վերադարձել ռազմաճակատից, որտեղ եղել է առաջին օրվանից:

Տոնոյանը հայտարարեց, որ մենք պատերազմը տանուլ ենք տվել 94 թվականի զինադադարի ստորագրման հաջորդ օրվանից, քանի որ չենք պատրաստվել նոր պատերազմի. «Մենք դասեր պետք է քաղենք: Ժողովուրդը 70 տոկոս քվե տվեց այս ապաշնորհ իշխանությանը վիճակը փոխելու համար, սակայն նրանք սկսեցին վհուկների որս ու ազգը բաժանեցին սևերի ու սպիտակների: Այսօրվա մեր պարտության սև ծաղկեպսակն իրենք դրեցին»,-ասաց Տոնոյանը։

Տոնոյանը հայտարարեց, որ հայ զինվորը չի պարտվել. «Ամոթ նրան, ով կասի մեր զինվորը, գեներալը չեն կռվել: Տեսեք, թե քանի գեներալ ունենք, ովքեր բլիժնի բոյի ժամանակ պուլիվոյ վերքեր են ստացել: Մեր բանակը կռվող բանակ է:

Առաջին 7 օրվա ընթացքում մենք սարսափելի մեծ կորուստներ ենք տվել, բայց նահանջել ենք ընդամենը մի քանի սանտիմետր»,-ասաց նա:

Բժիշկ-ազատամարտիկ Տոնոյանը նշեց, որ սա իշխանության կռիվ չէ, սա պոռթկում է հայրենիքի կորստի. «Արթնացեք, հասկացեք, որ սրանով պատերազմը չի վերջանում, հասկացեք, որ այս իշխանությունը 2,5 տարի օր օրի խաբել է մեզ, խոստումներ է տվել ու ոչինչ ենք ունեցել ադյունքում: Ինչ էր անում մեր իշխանությունը, երբ Թուրքիան իր զրահատեխնիկան թողեց Ադրբեջանում: Փոխանակ ԱԹՍ-ներ, ՀՕՊ ձեռք բերեին, փիառ էին հավաքում զինվորների մայրերի մոտ, թե մեր զինվորները 4 տեսակ աղցաններով սուրճ ու պաղպաղակ են ուտում: Շոումեններ են, այլևս չեն կարող մնալ»:

Տոնոյանը հայտարարեց, որ այլ բանակցողի դեպքում բազմաթիվ կետեր կան, որոնք կփոխվեն ի օգուտ Արցախի. «Նիկոլը պետք է հեռանա»․-ասաց նա: