Պատերազմի հերոսներից զոհված մայոր Մկրտիչ Հակոբյանի մոր ելույթը՝ Նիկոլ Փաշինյանի հրաժարականը պահանջող հանրահավաքի ժամանակ․

«Իմ սիրելի հայ  ժողովուրդ, երևի թե պատկերացնում եք, թե ես ինչ սրտի կսկիծով եմ եկել այստեղ, արցունքը խեղդում է ինձ, 40 օր է ես ողբում եմ։ Ես հասարակ , անկուսակցական մի բուժքույր եմ, որ իր կյանքի 40 տարին տվեց ծառայելու ժողովրդին, իմ երկրին, մեր երկրին տվեց մի առյուծ զավակ, լուրջ զինվորական պատրաստվածություն անցած, Հունաստանում սովորած առյուծ։

Ես պատրաստ եմ և պատրաստ էի, երբ իմ որդին գնում էր սովորելու, ես գիտեի, որ եթե զինվոր է, պիտի իր հայրենիքը պաշտպանի, դա նորմալ է, բայց նորմալ չի նա, որ հիմա չգիտեմ ինչի համար իմ որդին գնաց ու զոհվեց։ Ո՞ւր եք որդեկորույս մայրեր, մի՞թե դուք ոչինչ չունեք ասելու այստեղ, ինչի՞ դուք այստեղ չեք։ Ես պատասխան եմ պահանջում այն մարդուց, ով ստորագրեց ու հողերը հանձնեց։ Ինչպես իր տիկինը մի հարցարզրույցում ասեց՝ հանուն ոչնչի, այսօր ես հասկացա՝ հանուն ոչնչի։

Հիմա իմ որդու մասունքներն անգամ չկան, դուք դա հասկանո՞ւմ եք, դուք դա պատկերացնո՞ւմ եք, իմ նման հազարավոր մայրեր կան, ես կուզեի, որ այստեղ տեսնեի այդ հազարավոր մայերին։ Եթե իմանայի, որ 40 օր ողբալով իմ որդուն, մյուսների որդուն հնարավոր է հետ բերել, պատը գլխներովս կտայինք, գլուխներս պատով, 40 օր կողբայինք, բայց մեր երեխեքին հետ կբերեինք։

Հիմա որտե՞ղ են մեր բալիկները, որտե՞ղ են մեր ծնած ու սնած զինվորները, որտե՞ղ են նրանց մարմինները, մենք չգիտենք, որովհետև դա տրված է թուրքին, անգամ մասունքներն իրավունք չունենք բերելու, հողին հանձնելու ու դրանով սփոփվելու։

Կներեք, սիրելի ժողովուրդ, չեմ կարողանում խոսել, շատ բան ունեմ ասելու, շատ բան է կուտակված, բայց պիտի վարչապետը գա ու ինձ պատասխան տա։ Թող իմ աչքերի մեջ նայի ու ասի, թե ինչի՞ համար ես տվեցի այդ հողերն, ո՞ւմ համար։ Ես այլևս ոչինչ չունեմ կորցնելու, իմ ամենանվիրական մասունքը ես տվեցի, բայց պարզվում է, որ ես ազգին չեմ տվել, երկրին չեմ տվել, ես թուրքի հողին եմ տվել, ինչի՞ համար, թող գա վարչապետն ու պատասխան տա, եթե այդքան թասիբ ունի։ Թող գա ու պատասխան տա»։