«Հայրենիք» զարգացման հիմնադրամի գրասենյակում ԱԱԾ-ն խուզարկություն է իրականացրել՝ առանց խուզարկության թույլտվության, լրագրողներին հայտնեց «Հայրենիք» կուսակցության խորհրդի անդամ Արսեն Բաբայանը:

Նա ասաց, որ չգիտի՝ ինչ էին փնտրում:

«ԱԱԾ-ն դատարանի թույլտվություն չուներ, որպեսզի իրականացներ խուզարկություն: Մասնավորապես, իմ և մյուս աշխատակիցների աշխատասենյակներում նրանք ապօրինի խուզարկություն իրականացրեցին», - ասաց Բաբայանն՝ ընդգծելով, որ իրավական բոլոր ընթացակարգերով բողոքարկումներ են իրականցվելու:

Ըստ նրա՝ գիտեն, որ հիմնադրամի հոգաբարձունների խորհրդի նախագահը Արթուր Վանեցյանն է և քաղաքական նույն հետապնդումների շրջանակում իրականացնում են հերթական ապօրինի քաղաքական հետապնդումը:

«Ես սկսում եմ մտածել, որ, Ալիևի հանձնարարությամբ Փաշինյանը փորձում է մեզ լռեցնել, որ Արցախը հանձնելու իր ծրագիրը կարողանան հասցնել մինչև վերջ: Իրար հետ ակտվ աշխատում են», - նկատեց նա: