Երկու րոպե առաջ Կարեն Հարությունյան անունով մի քաղաքացի զանգել է Իվետա Տոնոյանին և սպառնացել հաշվեհարդար լինել, նման դեպքերը բազմաթիվ են, Երևանի ընդհանուր իրավասության դատարանի առջև տեղի ունեցող հավաքի ժամանակ ասաց ԱԺ «Բարգավաճ Հայաստան» խմբակցության պատգամավոր Արման Աբովյանը։

Նա նշեց, որ Ազգային ժողովի փոխնախագահ Լենա Նազարյանն իր էջում քարոզում է հաշվեհարդար լինել ընդդիմախոսների հետ։ «Սա է այսօրվա իշխանության ոճը»,– ասաց նա:

Նշենք, որ  Երևանի ընդհանուր իրավասության դատարանը քննում է «Հայրենիք» կուսակցության ղեկավար, Ազգային անվտանգության նախկին պետ Արթուր Վանեցյանի ձերբակալելու որոշման իրավաչափության հարցը: Դատարանի բակում են հավաքվել տարբեր կուսակցությունների ներկայացուցիչներ, քաղաքացիներ:

Արման Աբովյանը նշեց, որ իրեն ևս զանգում՝ սպառնում և վախեցնում են, որի համար դիմել են Ոստիկանություն:

«Ես չեմ պատկերացնում ազատամարտիկ, որ ցանկանում է, որ Արցախն անցնի թուրքերին: Իմ մոտ տպավորություն է, որ թուրքերն են վրա տվել և սպառնում են, որ չխոսենք, որովհետև Արցախը անցել է թուրքերի»,– ասաց նա:

«Սպառնում են այն մարդկանց, որոնք դեմ են, որ Արցախն անցնի թուրքերին: Դուք չեք ընկալում, թե ինչ մղձավանջ է սկսել, եթե մեկին թվում է, թե սա պրոցեսի վերջն է, սա պրոցեսի սկիզբն է: Դուք ի՞նչ դեմքով եք գնալու բանակցությունների, երբ ձեզ թշնամին ձեռ է առնում: Դիմում եմ ոստիկանությանը և պատշաճ մարմիններին և նրանց, ովքեր լծված են ընդդիմությանը վախեցնելով և քրեական գործեր հարուցելով ձեր գործով զբաղվեք»,- նշեց նա: