Հայ ժողովուրդը սգում է, հայ ժողովուրդը ապրում է, հայ ժողովուրդը ողբում է այդ կորստով։ Թերևս պատահական չէ, որ այսօր Արցախի թեմի 30 տարվա  առաջնորդ Պարգև Սրբազանը սրտի կաթված է ստացել, որովհետև Պարգև Սրբազանն է, որ գիտի ինչ է կորցրել, Պարգև Սրբազանն է, որ 92 թվականի մայիսի 8-ին արտասվելով աղոթք է կարդացել Ղազանչեցոցում։ Պարգև սրբազանն է, որ Շուշվա ամեն մի վերանորոգվող տնով է ուրախանում ու ապրում։ Պարգև Սրբազանն է, որ ամեն մի ծնունդով ուրախանում է, Պարգև Սրբազանն էր, որ կնքում էր հարյուրավոր այն երիտասարդներին, որոնք պսակվեցին Արցախում, որոնք պսակվեցին ու հսկայական զավակներ ունեցան, շատերը հենց Արցախում։ Պարգև Սրբազանն էր, որ հասկանում էր, թե ինչ է Շուշին, ինչպես ամեն մեկդ եք հասկանում Շուշին ինչ է, ի տարբերություն Հայաստանի Հանրապետության այդ մեկ մարդու, որ անամոթների առաջ, անամոթ պատգամավորների առաջ, անամոթաբար Շուշին մռայլ քաղաք է համարում, որովհետև երևի նրա կյանքում, մի քանի անգամ Արցախում լինելով, հետո իբրև վարչապետ Արցախ գնալով, բացի հյուրանոցի սենյակներից և թանկարժեք ռեստորաններից այնկողմ չհասավ, չտեսավ Հադրութը, չտեսավ Փալար գյուղը, չտեսավ բազմաթիվ գյուղեր։ Այս մասին Ազատության հրապարակում Նիկոլ Փաշինյանի հրաժարականի պահանջով հանրահավաքի ժամանակ հայտարարեց Գեղամ Մանուկյանը։

Մանուկյանը նշեց, որ Փաշինյանը Քարվաճառը, Դադիվանքը, ամեն ինչը պատկերացնում էր միայն ՀԴՄ կտրոնով․ «ՀԴՄ կտրոնները վերցրա ու գնա, Նիկոլ։ Դու գնաս, ժողովուրդը կվճարի կտրոնները, հավերժ քո թոշակն էլ կտա, ընտանիքիդ թոշակն էլ կտա, կպահի քո անվտանգությունը։ Բայց հանուն երկրի, հանուն մեր արժանապատվության, հանուն ուղղակի այս մարդկանց բեռի, գնա»։

Նա ընդգծեց, որ Փաշինյանը պետք է հասկանա՝ մարդկանց հոգեվիճակի վրա է ազդում։ Մարդիկ դժբախտ են, իսկ նա կրկնակի է դժբախտացնում իր անիմաստ ու սուտ խոսքերով․ «Ռուսի ասած՝ «крутится» լինելով 30 տարին այդպես ապրեցիր, թերթովդ այդպես ապրեցիր։ Հարամեցիր ժուռնալիստիկա մասնագիտությունը։ Աստծու սիրուն, գնա։

Ու այսօր էլ, երեկվա չգիտեմ ինչ հոգեվիճակում և ինչից հետո այդ ցնդաբանություն գրությունից հետո, ասում ես, որ բռնություն չես կիրառում և բողոքավորներն ընդիմություն են, վստահեցնում ես, որ բռնություն չես կիրառում։

Նիկոլ, տարիներ շարունակ դու այնքան չես սիրել երկիրը, այնքան չես սիրել մեր ժողովրդին, որ միշտ սադրել ես բռնության։ Բռնության հետևանքով ունեցել ենք ցավալի զոհեր, դու միշտ սադրել ես։ Բռնության սադրիչը դու ես, այստեղ կանգնած մարդիկ չեն։ Այն քաղաքական կուսակցությունները, որոնք հավաքվել են այսօր հայրենիքի համար են հավաքվել։ Հանուն հայրենիքի նրանք բռնության չեն դիմելու։

Հիմա, մինչև հանրահավաքը խաղաղության քարոզ։ Խնդրում եմ, ամեն մեկդ մտքում աղոթք բարձրացնի ի հիշատակ մեր զինվորների, աղոթք բարձրացնի ի առողջություն Պարգև Սրբազանի»։