ՀՀ Մարդու իրավունքների առաջին պաշտպան Լարիսա Ալավերդյանն Ազատության հրապարակում իր ելույթի ժամանակ նշեց, որ պատրաստ է պաշտպանել նաև Նիկոլ Փաշինյանին՝ ձերբակալվածի, մեղադրյալի, կալանավորվածի կարգավիճակում․ «Ես ուզում եմ դիմել մեր ազգի արժանապատիվ քաղաքացիներին, ուզում եմ դիմել ազնիվ մարդկանց և հստակեցնել, որ ձեր մոտեցումը չպիտի երբեք ճնշված լինի մի դժգոհ և դժբախտ էակի խոսքերից։ Դժբախտ և դժգույն էակը չպիտի մտնի ձեր հոգիները։

Որպես Մարդու իրավունքների առաջին պաշտպան ես ուզում եմ ասել հետևյալն՝ ի՞նչ է նշանակում բարոյական պատասխանատվություն՝ այսօր վարչապետի աթոռը զբաղեցնող անձը պետք է անպայման հրավիրվի և պատասխանատվություն կրի ՀՀ Քրեական օրենսգրքով։

Ես որպես մարդ, որ միշտ պաշտպանել եմ բոլոր ձերբակալվածներին և պատիժը կրող անձանց, կպաշտպանեմ և Նիկոլ Փաշինյանին՝ որպես ձերբակալված և մեղադրյալ անձ, որովհետև չի կարելի այլ ձևով։

Հիմա ես դիմում եմ բոլոր նրանց, ովքեր ջատագովն են Նիկոլ Փաշինյանի, փրկեք ձեր կուռքին, որ իրեն սպառնացող վտանգներն ավելի շատ չլինեն, ճիշտ է, որ ինքը ժամ առաջ հեռանա և ճանաչի իր պատասխանատվության այն չափաբաժինը, որը սահմանված է քրեական օրենսգրքով և դրանով ավելի պաշտպանված լինի այն վայրերում, որտեղ պաշտպանված են լինում բոլոր կալանավորները, ձերբակալվածները, բոլոր պատիժը կրողները։

Դա լավագույն ելքն է այն անձի համար, որը երկուսուկես տարի և մեկ շաբաթ իր մեջքին ուներ հայատյաց ամբողջ պաշարը»։