«Հրապարակ» թերթը գրում է. «Նիկոլ Փաշինյանին ճանապարհ փակելով իշխանության բերեցին, ճանապարհ փակելով էլ փորձում են հեռացնել։ Երեկ նրան դավաճան անվանող ու նրա հեռացման համար օրեր շարունակ ակցիաներ, հանրահավաքներ անող բազմաթիվ քաղաքացիներ որոշել էին դիմել Փաշինյանի սիրած մեթոդին՝ փողոց փակելուն։ Կեսօրին մայրաքաղաքի մի շարք փողոցների երթևեկությունը կաթվածահար էր եղել։

Փաշինյանին դեմ դուրս եկած քաղաքական ուժերի մի շարք ներկայացուցիչներ և ընդդիմադիր քաղաքացիներն իրենց մեքենաներով փակել էին Բաղրամյան-Մոսկովյան, Մաշտոցի պողոտա-Ամիրյան փողոց, Տիգրան Մեծ-Ագաթանգեղոսի և այլ խաչմերուկները ու պահանջում էին Փաշինյանի հեռացումը՝ վանկարկելով․ «Նիկո՛լ, դավաճան»։ Ակցիան կարճ տևեց՝ մոտ 30 րոպե, սակայն միջադեպ գրանցվեց․ Ամիրյան փողոցում Mercedes Sprinter-ի վարորդը զայրացած վարեց իր ճանապարհը փակած ցուցարարների վրա՝ վրաերթի ենթարկելով մի աղջկա, ասացին՝ ՀՅԴ անդամ։ Բարեբախտաբար,  լուրջ վնասվածքներ նա չէր ստացել, բայց միջադեպը մեծ աղմուկ բարձրացրեց հանրության շրջանում, մարդիկ պահանջում էին անհապաղ գտնել և պատժել մեքենայի վարորդին։ Ենթադրվում է, որ փողոց փակելու ակցիաները շարունակական կլինեն»:

Մանրամասն՝ թերթի այսօրվա համարում