Ես մասնակցում եմ ակցիային, որովհետև համարում եմ, որ յուրաքանչյուր գիտակից քաղաքացի պետք է բարձրացնի իր բողոքի ձայնը: Այս մասին Բաղրամյան պողոտայում Նիկոլ Փաշինյանի հրաժարականի պահանջով անհնազանդության ակցիայի ընթացքում Tert.am-ի հետ զրույցում ասաց ԱԺ աշխատակազմի նախկին ղեկավար-գլխավոր քարտուղար, Արա Սաղաթելյանը, որը ակցիայի մեկնարկին բերման ենթարկվեց:

«Այս դավաճանական գործողությունների հետ կապված յուրաքանչյուր քաղաքացի պետք է այսօր դուրս գա փողոց և իր քաղաքացիական դիրքորոշումն արտահայտի, քանի որ կնքված պայմանագիրը, բացի նրանից, ինչ մենք ունենք, նաև շատ բարդ հետևանքներ է ունենալու ՀՀ-ի և հայ ժողովրդի համար, որովհետև գալիք դժբախտությունները, այդ թվում՝ Ադրբեջանի կողմից միջազգային դատարաններում ներկայացված հայցերը բերելու են նրան, որ այս ժողովուրդն ապրելու է թշվառ և աղքատ»,-ասաց նա:

Նա կոչով դիմեց ժողովրդին՝ ասելով. «Ես բոլորին կոչ եմ անում դուրս գալ փողոց և հասնել նրան, որ վարչապետի աթոռն ապօրինի զբաղեցրած Նիկոլ Փաշինյանը հրաժարական տա, այնուհետև ձևավորվի ժամանակավոր կառավարություն և ստեղծվի իրավիճակ, երբ մասնագետները կարողանան շտկել, ինչ հնարավոր է կնքված փաստաթղթից»,-ասաց նա:Նշենք, որ ոստիկանները բերման ենթարկեցին վարչապետի հրաժարականը պահանջող քաղաքացիների: