Ոստիկանության այս գործողությունները հանցագործություն են, ոստիկանության այս գործողությունը նորից Շուշին ծախելուն է հավասար, նորից Վազգեն Սարգսյանի արձանը պղծել է։ Այս մասին լրագրողների հետ զրույցում Բաղրամյան պողոտայում ասաց իրավապաշտպան Ռուբեն Մելիքյանը։

Նշենք, որ ոստիկանները բռնի կերպով բերման ենթարկեցին խաղաղ անհնազանդության ակցիա անող քաղաքացիներին, հասարակական–քաղաքական գործիչների, քաղաքագետների։

«Այս ամենը բացարձակապես ապօրինի է։ Ոստիկանությունն իրավունք չունի խոչընդոտել քաղաքացիներին իրականացնելու ազատ ակցիաներ, այդ թվում փողոցները փակելու ձևով։ Առավելագույնը, որ կարող է անել Ոստիկանությունը՝ պայմանավորվել որոշակի ժամանակահատվածի մասին, ընդ որում, մենք նկատեցինք, որ Ոստիկանությունը բերման է ենթարկում մարդկանց, որոնք փողոցի վրա չէին»,– ասաց նա։

Ռուբեն Մելիքյանը ևս մեկ անգամ ընդգծեց, որ սա խաղաղ անհնազանդության գործողություն է, որ այդ մարդիկ խաղաղ անհնազանդություն են հայտնում Շուշի հանձնողներին։ «Սա արժանապատվության ճգնաժամ է մեր երկրում, մարդիկ պետք է տեսնեն, որ մենք մեր արժանապատվությունը չենք կորցրել և բողոքում ենք այն մարդկանց դեմ, որ ոչ միայն հանձնեցին մեր հայրենիքը, այլ կպած նաև իրենց աթոռներից, ցանկություն ունեն պաշտոնավարել, երկրորդական, երրորդական պաշտոնյաների փոխելով»,– շեշտեց նա։

Հարցին՝ մտավախություն չունի՞, որ իրեն էլ բերման կենթարկեն, ասաց, որ ոչ մի բանից էլ մտավախություն չունի, թող գնդակահարեն, ինչ ուզում են թող անեն, ինքը հայրենիք է կորցրել։