Վլադիմիր Պուտինի համար «Մեծ քսանյակ»-ի (G20) գագաթնաժողովի հիմնական թեման կլինի COVID-19-ի դեմ պայքարը և տնտեսության համար համաճարակի հետևանքները նվազագույնի հասցնելը: Այս մասին հայտարարել է ՌԴ նախագահի մամուլի խոսնակ Դմիտրի Պեսկովը, գրում է «ՌԻԱ Նովոստի» գործակալությունը:

«Այս տարի բոլորի համար կա մեկ կարևոր թեմա, բոլորը համակարծիք են սրա շուրջ, դա կորոնավիրուսային վարակի տարածման դեմ պայքարելու և ամբողջ աշխարհում սոցիալ-տնտեսական ոլորտի համար համաճարակի հետևանքները նվազագույնի հասցնելու թեման է»,-նշել է Պեսկովը:

Կրեմլի խոսնակը հայտնել է նաև, որ կազմակերպիչները դեռ հստակեցնում են ելույթների ծրագիրը: Այնուամենայնիվ, արդեն հայտնի է, որ Պուտինը չի նախատեսում արդյունքների վերաբերյալ մամուլի ասուլիս անցկացնել:

G20-ի գագաթնաժողովը տեղի կունենա նոյեմբերի 21-22-ը` Սաուդյան Արաբիայում: Այն տեղի կունենա առցանց ռեժիմով: Համաշխարհային առաջնորդները կքննարկեն կորոնավիրուսային վարակի տարածման, էներգիայի, կլիմայի և կոռուպցիայի դեմ պայքարի խնդիրները: