Վարչապետի օգնական Նաիրի Սարգսյանը ՊՆ դիմաց հավաքված անհետ կորած զինծառայողների ծնողներին տեղեկացրեց, որ վարչապետի հանձնարարությամբ միջգերատեսչական հանձնաժողով կստեղծվի։

Այս հայտարարությունն առաջացրեց ծնողների զայրույթը։

«Այդ հանձնաժողովը նո՞ր եք ուզում ստեղծել։ Հոկտեմբերի 5-ից մեր երեխաներից տեղեկություն չունենք, դուք նոր եք հանձնաժողով ստեղծում։ Երբ Սասուն Միքայելյանը վիրավորվեց, բոլորն իմացան, մեր երեխեքը 50 օր կորել են, դուք մեզ տվյալներ չեք տալիս, դա ճի՞շտ է», - ասաց ծնողներից մեկը։

Մարտական գործողությունների ընթացքում գերեվարված, անհետ կորած զինծառայողների և այլ անձանց հանձնաժողովի նախագահ Վիտալի Ոսկանյանն ասաց, որ երեկ Մատաղիսից, Մարտունիից և դեպի աջ գնացող կետերից մարմիններ են հանել։

«Նոյեմբերի 12-ից սկսած հանձնաժողովը տվյալներ է տրամադրում Կարմիր խաչին, ՌԴ-ին, մերոնք առաջնագծում են։ Ողջ երեխաներ ունենք, որոնց կարողացել ենք տարբեր հատվածներից գտնել, ծնողները տեղյակ են, այս պահի դրությամբ մարմիններ ենք հանում։ Այսինքն՝ այն հանձնաժողովը, որն աշխատում է, շարունակելու է աշխատել։ Վարչապետի որոշմամբ ձևավորվելու է ավելի ընդլայնված հանձնաժողով, որն ավելացնելու է մեր ներուժը։ Գործընթացը 24 ժամ շարունակվում է», - ասաց Ոսկանյանը։