Վաղը՝ նոյեմբերի 24-ին, տեղի է ունենալու Երևանի ավագանու նիստ։ Նիստի օրակարգում ընդգրկված է նաև Երևան քաղաքի ավագանու 2019 թվականի դեկտեմբերի 25-ի N178-Ն որոշման մեջ փոփոխություն անելու մասին հարցը։ Այս որոշմամբ նախատեսված է Երևան քաղաքի սեփականություն հանդիսացող գույքը օգտագործման տրամադրել և 2020թ-ին այն օտարել։ Նոր լրացմամբ նախատեսվում է 2020 թվականի ընթացքում համայնքային սեփականություն հանդիսացող ծառերի էտումից և չորացած ծառերի հեռացումից առաջացած փայտանյութը որպես ձմեռային վառելափայտ Երևանի քաղաքապետի որոշմամբ կարող է անվճար հատկացվել սոցիալապես անապահով ընտանիքներին: Անվճար ձմեռային վառելափայտ ստացող սոցիալապես անապահով ընտանիքների ցանկը, սոցիալապես անապահով ընտանիքների ընտրության չափորոշիչները, հատկացվելիք փայտանյութի չափաքանակը և հատկացման կարգը սահմանվում է Երևանի քաղաքապետի որոշմամբ։

Համաձայն Երևանի վարչական շրջանների ղեկավարների կողմից ստացված գրությունների, ներկայումս Երևան քաղաքում բնակվող սոցիալապես անապահով բազմաթիվ ընտանիքներ դիմում են վարչական շրջանների ղեկավարներին՝ հնարավորության դեպքում նրանց անվճար ձմեռվա վառելափայտ տրամադրելու խնդրանքով: Երևան քաղաքի ծառերի էտման և չորացած ծառերի հեռացման արդյունքում ներկայումս կուտակվել է շուրջ 500 խ.մ. փայտանյութ: