Հենց նոր Անկախ-ին հայտնի դարձավ, որ «Իմ քայլը» խմբակցության պատգամավոր Կորյուն Մկրտչյանի բնակարանի մոտ բողոքի ակցիա իրականացնող մի խումբ քաղաքացիների նկատմամբ բռնություն է կիրառվել:

Ակցիայի մասնակիցներից Ադրինե Ավագյանը մեզ պատմեց, որ իրենք 7 հոգով գնացել են պատգամավորի տան մոտ՝ կոչ անելով դուրս գալ խմբակցությունից, մասնակից չդառնալ գործող իշխանությունների դավաճանական գործունեությանը և հետագայում ազատվել նաև պատասխանատվությունից:

«Մենք մեր խաղաղ ակցիան ավարտել էինք, պատրաստվում էինք հետ գալ, երբ շենքի մոտ հայտնվեցին ինչ-որ տղամարդիկ և սկսեցին հայհոյել մեզ, վիրավորել, սադրել: Փորձեցինք սադրանքներին չտրվել, բայց բանը հասավ ծեծկռտուքի, հարձակվեցին մեր տղաների վրա, սկսեցին հարվածել ու հայհոյել: Մենք փորձում էինք բաժանել, բայց մեզ նույնպես սկսեցին հարվածել ու հայհոյել: Չէին նայում՝ կին է, տղամարդկ է, ոհմակով հարձակվել էին: Իմ դունչն է պատռվել, աչքս է վնասվել, մեջքիս ու որովայնիս են հարվածել: Մեր ընկերոջ քիթն է վնասվել, արյունահոսությունը չենք կարողանում կանգնեցնել, ուզում ենք շտապօգնություն կանչել, մյուսի դեմքն է վնասվել»:

Նաև պատմում է, որ իրենց բռնության ենթարկող տղամարդկանցից մեկն էլ փայտով հարվածում էր ակցիայի մասնակիցներից մեկին՝ բղավելով՝ ուր է դանակը, դանակ բերեք: 

Ադրինե Ավագյանի խոսքով՝ իրենք այդ ամբողջը, որքան հնարավոր է եղել, նկարել են և պատրաստվում են դիմել ոստիկանություն՝ իրենց խաղաղ ակցիային խոչընդոտած և իրենց բռնության ենթարկած անձանց պատասխանատվության ենթարկելու նպատակով:

Տեսանյութը՝ շուտով: