Պետք չէ հուսալ, որ Հայաստանի ներկայիս իշխանությունները կկարողանան զբաղվել ռազմագերիների վերադարձի հարցով: Հայաստանում այժմ իշխանություն չկա, այլ կա միայն մեկ մարդ (վարչապետ Նիկոլ Փաշինյանը-խմբ.), ով «հուշագրություններ» է գրում Ֆեյսբուքի իր էջում: Այս մասին լրագրողների հետ զրույցում ասաց Ազգային ժողովի մարդու իրավունքների պաշտպանության եւ հանրային հարցերի մշտական հանձնաժողովի նախագահ, «Բարգավաճ Հայաստան» կուսակցության պատգամավոր Նաիրա Զոհրաբյանը:

Նրա խոսքով՝ հուսալ, որ այդ մարդը կարող է զբաղվել ռազմագերիների հարցերով, նոնսենս է: «Երեկ նա հերթական անգամ շանտաժի ենթարկեց մեր զինծառայողների ծնողներին՝ հայտարարելով, թե «արեք ամեն ինչ, որպեսզի ես մնամ, եւ այդ ժամանակ ես կկարողանամ վերադարձնել ձեր երեխաներին»: Հարգելի՛ ծնողներ, որքան երկար այդ մարդը մնա վարչապետի պաշտոնում, այնքան կասկածի տակ կդրվի ձեր երեխաների վերադարձի հարցը: Եկեք անկեղծ լինենք՝ ռազմագերիների վերադարձի համար պետք է խոսել Ալիեւի հետ: Ինչպե՞ս եք դա պատկերացնում: Ինչպե՞ս է այդ վիճակում գտնվող մարդը խոսելու Ալիեւի հետ կամ էլ ինչպե՞ս է Ալիեւը կարողանալու լուրջ ընդունել նրա խոսքերը: Ռազմագերիների վերադարձի համար մեզ նոր բանակցող է պետք: Այդ դեպքում մենք հնարավորություն կունենանք տուն վերադարձնել մեր երեխաներին»,-նշեց Զոհրաբյանը: