Վազգեն Մանուկյանը ունի այն փորձառությունը, անցած ճանապարհը, որ այս դժվար պահին որոշում ենք կայացրել առաջադրել Վազգեն Մանուկյանին: Այս մասին լրագրողների հետ զրույցում ասաց «Հայրենիք» կուսակցության նախագահ Արթուր Վանեցյանը:

«Վարչապետ ընտրվելու դեպքում Վազգեն Մանուկյանը կասեցնելու է կուսակցական գործունեությունը, լինելու է ապակուսակցական վարչապետ և որոշակի ժամանակ անց պարտավորվելու է անցկացնել արտահերթ խորհրդարանական ընտրություններ, որին ինքը չի մասնակցելու և չի աջակցելու որևէ քաղաքական ուժի»,-ասաց նա և նշեց, որ ինքը մասնակցելու է խորհրդարանական ընտրություններին, իսկ ժամկետները շուտով հայտարարության մեջ կնշեն:

Ըստ նրա` Վազգեն Մանուկյանը միանշանակ կարող է նստել բանակցային սեղանի շուրջ և լուծել Հայաստանի առաջ ծառացած դժվարագույն խնդիրները: Նա նշեց, որ Հայաստանի ներքին հարցերը ՀՀ քաղաքացիները պետք է լուծեն:

«Հանրության մեջ կա գրեթե հարյուր տոկսոանոց կոնսեսուս, որ Նիկոլ Փաշինյանը ոչ մի տեսանկյունից իրավունք չունի զբաղեցնել ՀՀ վարչապետի պաշտոնը: Այդ մոտեցումը կա, համոզված եմ, խորհրդարանում: Այսօր կա այդ պահանջը, որ նոր վարչապետ պետք է լինի, ուղղակի հանրային ճնշման մեխանիզմները պետք է մեծացնենք և կարճ ժամանակահատվածում ԱԺ պատգամավորները դուրս կգան ներքին վախերից և կքվեարկեն ժողովրդի թեկնածուի օգտին:Նիկոլ Փաշինյանի մեկ օր ավելի իշխանության ղեկին մնալը դա ազգային անվտանգության սպառնալիք է մեր երկրի և մեր ժողովրդի համար»-ասաց նա և նշեց, որ ժողովուրդը պետք է գիտակից, որ սա ոչ թե իշխանության համար, քաղաքական պայքար է, այլ պայքար է հանուն մեր հայրենիքի փրկություն։