«Հենակետ» վերլուծական կենտրոնի նախագահ, Արցախի նախկին նախագահ Բակո Սահակյանի խորհրդական, փոխգնդապետ Տիգրան Աբրահամյանը այս պահին օրակարգային է համարում մեկ հարց՝ գործող իշխանության հեռացումը, որը լրջորեն վնասել է Հայաստանի ու Արցախի անվտանգությունը։

Այս մասին Աբրահամյանը նշեց MegaNews.am-ի հետ զրույցում։

«Հայրենիքի փրկության» ազգային շարժումը, որը ստեղծվել է ընդդիմադիր 17 ուժերի հրավիրած խորհրդի նիստում, այսօր հայտարարություն է տարածել՝ ներկայացնելով երկրում ստեղծված ճգնաժամային իրավիճակից դուրս գալու ճանապարհային քարտեզը։ Որպես անցումային կառավարության ղեկավար՝ Հայաստանի Հանրապետության վարչապետ, Խորհուրդն առաջադրում է Վազգեն Մանուկյանի թեկնածությունը, որն ունի հակաճգնաժամային կառավարման փորձ, արդյունավետ բանակցություններ վարելու կարողություն, ներքին համերաշխություն և համազգային համախմբվածություն ապահովելու կամք ու վճռականություն:

Անդրադառնալով վերոնշյալին՝ Տիգարն Աբրահամյանը նշեց․ «Ներքաղաքական այլ իրողությունների հետ կապված՝ չեմ ուզում շատ ծավալուն խոսել․ Վազգեն Մանուկյանի կերպարին չեզոք-դրական եմ վերաբերվում»։

Մեր երկրում ծառացած հիմնական խնդիրները Տիգրան Աբրահամյանը համարում է ոչ այնքան ներքաղաքական, այլ ազգային։

«Կարծում եմ՝ հանրության մեծ մասի համար խնդիրը ոչ թե ինչ-որ գործչին մեկ ուրիշով փոխելն է, այլ մեր ժողովրդին այս աղետալի վիճակին հասցրած քաղաքական գործչի և նրա թիմի հեռացումը։ Նիկոլ Փաշինյանը զրոյացրել ու փոշիացրել է այն ամենը, ինչ մենք վերջին երկու-երեք տասնամյակում կառուցել էինք։ Չկա այլ ճանապարհ, քան նրա հեռացումն է։ Այս պաին չեմ պատկերացնում մի գործչի, որը կարող է ավելի շատ վնաս հասցնել մեր հայրենիքին ու ժողովրդին, քան Փաշինյանը», — նշեց Տիգրան Աբրահամյանը։

Ըստ նրա՝ ցանկացած քաղաքական գործչի համար նման իրավիճակում հեռանալը բարոյական քայլ պիտի լիներ։

Դիտարկմանը, թե մամուլում լուրեր են շրջանառվում այն մասին, որ Ավինյանն ու Արարատ Միրզոյանը փորձում են առաջ մղվել ու վարչապետի պաշտոնը ստանձնել առաջիկայում, ուստի նրանցից յուրաքանչյուրը ջանում է համակիրներին իր շուրջը համախմբել, Տիգրան Աբրահամյանը պատասխանեց․ «Որքան էլ Փաշինյանը ուզում է ուզում է ցույց տալ, որ իր հեռանալու հիմքերը ինքը չի տեսնում, դա ասում են նաև նրա խորհրդարանական կրտսեր գործընկերները, բայց, ամեն դեպքոիմ, հասկանալի է՝ նրանք ևս գիտակցում են, որ այսպես հնարավոր չէ շարունակել ու փորձում են իրենց համար հարմար ելք գտնել։ Թե իրենց ներսում ում թեկնածությունը կփորձեն առաջադրել, իրենց կուսակցության ներքին գործն է։ Երբ իրենց թեկնածուին կներկայացնեն, քաղաքացիները կորոշեն՝ արդյո՞ք այսքան բանից հետո արժանի են համարում ընրտելու նրանց»։

Տիգգրան Աբրահամյանը ընդգծեց՝ ստեղծված քաղաքական իրավիճակում միակ օպտիմալ տարբերակը 17 կուսակցությունների ներկայացրած ծրագիրն է՝ ազգային համաձայնության կառավարության ձևավորում՝ ժամանակավոր կառավարություն՝ մինչև արտահերթ ընտրությունների կայացում։ «Այս իրավիճակում իշխող քաղաքական ուժի ներկայացուցիչները պիտի հասկանան՝ որքան շուտ հեռանան, այնքան նաև անձնապես՝ իրենց համար լավ կլինի։ Անկախ նրանից՝ նրանց շարքում գոնե մի քիչ հայրենիքը սիրող մարդիկ կան, թե ոչ, մի բան փաստ է՝ նրանց՝ մեկ օր ավել իշխանության մնալը լրջորեն վտանգում է ՀՀ-ի ու ԱՀ-ի անվտանգությունը», — եզրափակեց Տիգրան Աբրահամյանը։