Խորապես հիասթափեցնող էր ՀՀ ԱԳ նորանշանակ նախարարի հետ այսօրվա փակ հանդիպումը։ Արա Այվազյանի պարզունակ ներածական-վերլուծական խոսքը արտաքին քաղաքական կարևորագույն իրողությունների, պատերազմի անխուսափելիության, արտաքին քաղաքական օրակարգի բացակայության, հարևանների և նրանց ռեգիոնալ դերակատարության խիստ մակերեսային պատկերացումների, հայ-թուրքական հարաբերությունների, Եվրամիության և ԱՄՆ-ի անելիքների և մի շարք կարևորագույն հարցերի վերաբերյալ նախարարի մտապատկերը, պատգամավորների կողմից ուղղված հարցերի պատասխանները լրջագույն մտորումների տեղիք են տալիս։ Այս մասին հայտնել է ԱԺ պատգամավոր Արման Բաբաջանյանը:

«Հայաստանի արտաքին քաղաքական գերատեսչությունը կարողությունների լրջագույն պակաս ունի։ Դա անհապաղ պետք է լրացնել։ Ոչ մի դեպքում չի կարելի թույլ տալ, որ Հայաստանի արտաքին քաղաքական միտքը այսքան կռնատ և ստեղծարարությունից զուրկ մնա։

Արա Այվազյանի իրավանախորդները իրենց հանցավոր անգործությամբ և նույնքան հանցավոր գործունեությամբ թեև կարողացել են հետաձգել պատերազմը, բայց դրանով հանդերձ ամեն օր սնել են հենց այս պարտությունը։ 44-օրյա պատերազմը, մեր տարածքային և մարդկային կորուստները Վարդան Օսկանյանի, Էդուարդ Նալբանդյանի և Զոհրաբ Մնացականյանի խղճին են։ Նրանց քաղաքական ղեկավարները՝ Ռոբերտ Քոչարյանը, Սերժ Սարգսյանն ու Նիկոլ Փաշինյանը հավասարապես պատասխանատու են այս մեծ արհավիրքի և մեր պետությունը այս մեծ տապալումին հասցնելու համար։

Պատերազմը բացահայտեց մեր դիվանագիտական մտքի տոտալ սնանկությունը։ Այսպես շարունակել չի կարելի»։