Ռուս խաղաղապահները Հայաստանի տարածքից Լեռնային Ղարաբաղ վերադարձող 778 փախստականների տեղափոխող ավտոբուսներ են ուղեկցել: Այս մասին հայտնում է ТАСС գործակալությունը՝ հղում անելով ՌԴ պաշտպանության նախարարությանը:

«Երևանից ավտոբուսներով այսօր 778 մարդ է տեղափոխվել Ստեփանակերտ: Ավտոբուսների տեղաշարժն իրականացվել է ռուս խաղաղապահ զորակազմի և ռազմական ոստիկանության հերթապահների ուղեկցությամբ»,- ասվում է ռազմական գերատեսչության հաղորդագրության մեջ:

Ընդհանուր առմամբ, Լեռնային Ղարաբաղի իրենց մշտական բնակության վայրեր վերադարձել են ավելի քան 34 500 փախստականներ:  

Պաշտպանության նախարարությունից նշել են, որ ռուս խաղաղապահներն ապահովում են ոչ միայն քաղաքացիների անվտանգ վերադարձն իրենց մշտական բնակության վայրեր, այլ նաև հումանիտար օգնություն են տրամադրում, վերականգնում են քաղաքացիական ենթակառուցվածքները:

Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: