ՀՀ Ազգային ժողովի պատգամավորների 1/5-ը գրությամբ դիմել է ԱԺ-ին՝ առաջարկելով հայ ռազմագերիների և գերեվարված քաղաքացիական անձանց գերությունից վերադարձնելու խնդիրը հրատապ թեմայով քննարկումն անցկացնել փակ նիստում: Այս մասին հայտնեց Լենա Նազարյանը:

«Իմ քայլը» խմբակցության ղեկավար Լիլիթ Մակունցը հայտարարեց, որ թեման շատ զգայուն է, նրանց անվտանգությունը չվտանգելու ու վերադարձնելու գործընթացը չխաթարելու համար խմբակցությունն ուզում է, որ քննարկումը փակ լինի:

«Լուսավոր Հայաստան» խմբակցության ղեկավար Էդմոն Մարուքյանն իր հերթին հայտարարեց, որ քննարկումը նախաձեռնվել է իրենց կողմից, նախաձեռնվել է նաև վերջում ուղերձի ընդունում. «Երեկ «Իմ քայլը» դաշինքի ԱԺ խորհրդի անդամները փորձել են տապալել ուղերձի այսօրվա քննարկումն ԱԺ խորհրդի նիստում, որտեղ պարզվել է, որ չեն կարող տապալել, հարցը պետք է պարտադիր քննարկվի: Ուզել են տապալել, քանի որ չեն ուզել մենք ելույթներ ունենանք: Երբ հասկացել են, որ չեն կարող տապալել, որոշել են քննարկումը փակ անել»:

Մարուքյանը նշեց, որ քննարկումը պետք է բաց լինի, պատգամավորներն այնպես կխոսեն, որպեսզի ռազմագերիներին վտանգի տակ չդրվի:

Կողմերն ընդհանուր հայտարարի չեկան: Արդյունքում Լիլիթ Մակունցը 20 րոպե ընդմիջում խնդրեց՝ հայտարարելով, որ իրենց որոշ պատգամավորներ մի փորք ուշանում են: