Ինչպես արդեն հայտնել ենք, Ազգային ժողովում մեկնարկել է հերթական քառօրյան: Քառօրյայի առաջին նիստը մեկնարկեց «մի կերպ»: Բանն այն է, որ նախ քվորում չեղավ: Նիստը մեկնարկեց միայն երկրորդ փորձից, քվեարկությունից հետո:

Ավելի ուշ, երբ Ազգային ժողովն արդեն քվեարկում էր ռազմագերիների վերաբերյալ հարցը փակ քննարկելու համար, տեղի ունեցավ ևս մեկ միջադեպ:

Նախ նշենք, որ նախաձեռնության հեղինակը «Լուսավոր Հայաստանն» է, ով պահանջում էր, որ քննարկումը լինի բաց: Սակայն «Իմ քայլը» խմբակցությունը հայտնեց, որ քննարկումը պետք է փակ լինի, ինչի համար գրությամբ դիմել են ԱԺ ղեկավարությանը: Քվեարկությունից առաջ Լիլիթ Մակունցը 20 րոպե ընդմիջում խնդրեց՝ հայտարարելով, որ իրենց պատգմավորներն ուշանում են:

Երբ արդեն նիստը վերսկսվեց, առաջին քվեարկության արդյունքում իմքայլականների ձայները չհերիքեցին: Լենա Նազարյանը ևս մեկ անգամ քվեարկություն կազմակերպեց: Այս անգամ ևս իմքայլականների ձայները չհերիքեցին: Լենա Նազարյանը մեկ անգամ էլ՝ արդեն երրորդ անգամ քվեարկության դրեց հարցը: Այս անգամ արդեն ամեն ինչ իշխանական պատգամավորների սրտով էր, հարցն ընդունվեց:

Շատերն են հիշում, թե ինչպես էր նախորդ նիստերից մեկի ժամանակ նույն Լենա Նազարյանն իմքայլականներին հորդորում սեղմել նաև բացակա պատգամավորների կոճակները: Շատերը կհիշեն նաև, թե ինչպես էր «ԵԼՔ» դաշինքի պատգամավոր Նիկոլ Փաշինյանը հետևում, թե ով ով ինչպես է քվեարկում, ինչպես են քվեարկում բացակա պատգամավորների փոխարեն, ֆիքսում դա ու աղմուկ բարձրացնում:

Ցավոք, այս ԱԺ-ում «նիկոլփաշինյան» չկա, որպեսզի պարզի, թե ինչով են զբաղված Նիկոլ Փաշինյանի պատգամավորները: