Կամավորական Գարիկ Գրիգորյանի մայրը՝ Կարինե Ադամյանը ֆեյսբուքյան իր էջում գրառում է կատարել՝ նշելով, որ հոկտեմբերի 28-ից տղայից լուր չունի:

«Հայ ժողովուրդ դիմում եմ Ձեզ

Ճակատագիրը շատ դաժան գտվեց իմ նկատմամբ. ամուսինս անհայտ կորած է 1992 թվականից, որդիս՝ Գարիկ Գառնիկի Գրիգորյանը, ով 13 տարեկանից կռվել է Արցախում, մասնակցել է ապրիլյան պատերազմին, այս տարի կամավոր մեկնել է Հայրենիքը պաշտպանելու։ Հոկտեմբերի 28-ից էլ լուր չունեմ:

Նիկո՛լ, դու կորցրեցիր դուխիներդ, կինդ ցավում է խաղալիքների համար, հասկանում եմ ձեր կորուստը շատ մեծ է, բայց քեզ ձեռք մեկնող կլինի... Իսկ ինձ ով պետք է օգնի, ով պետք է իմ խնդրով զբաղվի...

Հայ ժողովուրդ, ով կարող է օգնել ինձ, խնդրում եմ օգնեք գտնեմ որդուս, մենք կառավարություն չունենք, մենք չունենք պետական մարմիններում մեկը, ով կօգնի մեզ , դիմում եմ աշխարհի բոլոր հայերին, ով կարող է, օգնեք ինձ գտնեմ որդուս»,- գրել է Ադամյանը:

Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: