Ֆրանսիայի ինֆորմացիոն տեխնոլոգիաների և մարդու իրավունքների ազգային հանձնաժողովը տուգանել է Google-ին (պատկանում է Alphabet Inc. ընկերությանը) և Amazon.com-ին 100 մլն և 35 մլն եվրոյի չափով՝ համապատասխանաբար:

Ինչպես տեղեկացնում է «Ինտերֆաքս» գործակալությունը՝ հղում անելով ֆրանսիական աղբյուրին, ընկերությունները տուգանվել են առանց օգտատերերի համաձայնության cookies-ֆայլեր տեղադրելու համար:

Նշվում է, որ Google-ի նկատմամբ սահմանված տուգանքը ռեկորդային է, որը երբևէ սահմանել է տվյալների պաշտպանության հարցով եվրոպական գերատեսչությունը:

Cookies-ը ծառայողական տեքստային ֆայլեր են օգտատիրոջ ինտերնետային մուտքերի մասին տեղեկությամբ: Կայքերն այդ ծառայությունն օգտագործում են այցելուների մասին տվյալներ հավաքելու համար: Ֆրանսիական օրենսդրության համաձայն՝ cookies-ն օգտագործվում է միայն օգտատիրոջ համաձայնությամբ, երբ նրան տեղեկացնում են դրա գործունեության մասին: