Ադրբեջանի և Թուրքիայի նախագահների հայտարարությունները, ըստ էության, նրա մասին են, որ դեռ երկար այս տարածաշրջանում խաղաղության մասին խոսելը վաղ է լինելու: Այս մասին խորհրդարանական ճեպազրույցների ժամանակ հայտարարեց Էդմոն Մարուքյանը:

Մարուքյանի խոսքերով, պատահական չէր Ռուսաստանի ռեակցիան. «Նրանք իրենց հայտարարություններով նաև Ռուսաստանի դեմ են գնում, քանի որ փաստաթղթի միջնորդը, պահպանողը, հետևողը Ռուսաստանի Դաշնությունն է՝ որպես ՄԱԿ-ի ԱԽ մշտական անդամ երկիր, ԵԱՀԿ ՄԽ համանախագահ»:

«Մինչև Թուրքիան ու Ադրբեջանը չձերբազատվեն իրենց ցեղասպանական հայտարություններից, Երևանի մասին հայտարարություններից, ինչի մասին առաջին անգամ չեն հայտարարում, ես չեմ պատկերացնում որևէ հարաբերություն, գործակցություն՝ հանուն տարածաշրջանի զարգացման:

Նախ պետք է այդ հռետորաբանությունից հրաժարվեն: Երաշխիքներ պետք է լինեն, որ որևէ նպատակ չկա ոտնձգություններ իրականացնել ՀՀ սուվերեն տարածքի կամ Արցախի մնացած տարածքի նկատմամբ:

Մեր վերքերն այսօր շատ թարմ են, մենք չենք կարող հիմա նման խոսակցություններ վարել, եթե անգամ իրենք ասեին, որ ամեն ինչ լավ է:

Մեր վերքերը շատ թարմ են ու պատմությունը ցույց է տալիս, որ ժամանակ է պետք, որպեսզի կողմերը գիտակցեն, թե ինչ է տեղի ունեցել: Մենք դեռ տաք ենք, ամբողջ խորությամբ չենք պատկերացնում, թե ինչ է տեղի ունեցել մեզ հետ»,-ասաց նա: