Էդմոն Մարուքյանը չի կարծում, որ Նիկոլ Փաշինյանը գոնե տեսականորեն կարող է ևս մեկ տարի հրաժարական չներկայացնել. «Ես տեսնում եմ, որ ամենաուշը 6 ամսից մենք ունենալու ենք արտահերթ ընտրություններ: Թե ինչպես դա կլինի, ով կկազմակերպի… կարող է՝ սխալվում եմ, եթե սխալվեմ, կքննարկենք, թե ինչու դա տեղի չունեցավ»,-ասաց նա այսօր խորհրդարանական լսումների ժամանակ:

Լրագրողը նկատեց, որ Նիկոլ Փաշինյանի վարչապետությամբ արտահերթ ընտրությունները նշանակում են, որ ընդդիմության պահանջը չի կատարվել:

Բացի դրանից, ընդդիմադիր մյուս գործիչները պահանջում են, որ Նիկոլ Փաշինյանն օր առաջ հեռանա, իսկ արտահերթ ընտրությունները կազմակերպվեն այլ քաղաքական ուժերի միջոցով. «Նույն պահանջը նաև մենք ենք ներկայացրել, որ արտահերթ ընտրությունները մենք կարող ենք կազմակերել ու անցկացնել, երաշխավորում ենք դրանց արդարությունն ու թափանցիկությունը, որևէ մեկը չի կարող փող բաժանել:

Բայց ունենք այն, ինչ ունենք:

Ինչ վերաբերում է նրան, որ հրաժարականի չլինելու դեպքում ընդդիմության պահանջը չի կատարվում, ապա ասեմ, որ Հայաստանի քաղաքական պատմության մեջ ընդդիմության պահանջը մեկ անգամ է բավարարվել, երբ Նիկոլ Փաշինյանը պահանջեց Սերժ Սարգսյանի հրաժարականը: Այլ նման ցցուն օրինակ ես չունեմ: Անգամ Տեր-Պետրոսյանի հրաժարականն ընդդիմության պահանջը չէր»: