Ֆրանսիայի նախագահ Էմանուել Մակրոնը հայտարարել է, որ Արևելյան միջերկրածովյան տարածաշրջանում Թուրքիայի անօրինական գործունեության դեմ ԵՄ-ի նոր պատժամիջոցները ցույց են տալիս միության հաստատակամությունը, գրում է Reuters-ը։

«Նոր պատժամիջոցները, որոնք ԵՄ-ն պատրաստում է Թուրքիայի կողմից գազի հորատման աշխատանքների կապակցությամբ, ցույց են տալիս, որ ԵՄ-ն իր ուղեծրում այլևս ոչ մի ապակայունացնող գործողություն չի հանդուրժի»,- այսօր հայտարարել է Մակրոնը:

Մակրոնը Բրյուսելում ԵՄ գագաթնաժողովից հետո նաև հայտարարել է, որ «ԵՄ-ն շարունակում է պատրաստակամ լինել Թուրքիայի հետ երկխոսությանը»։

Ավելի վաղ ԵՄ առաջնորդները համաձայնության էին եկել Արևելյան Միջերկրական ծովում ապօրինի հորատման համար Թուրքիայի նկատմամբ գոյություն ունեցող անհատական պատժամիջոցներն ընդլայնելու մասին որոշման շուրջ: ԵՄ արտաքին և անվտանգության քաղաքականության գերագույն ներկայացուցիչ Ժոզեպ Բորելին հանձնարարվել է նաև աշխատել մինչև 2021 թվականի մարտը Արևելյան Միջերկրական ծովի իրադրության վերաբերյալ միջազգային խորհրդաժողով հրավիրելու ուղղությամբ և Թուրքիայի հետ հարաբերությունների մասին զեկույց մշակել:

Ինչպես ավելի վաղ հայտնել էր Reuters-ը՝ վկայակոչելով իր աղբյուրներին, Թուրքիայի դեմ ԱՄՆ պատժամիջոցները, որոնք ԱՄՆ-ն պատրաստվում է կիրառել Անկարայի կողմից ռուսական С-400- ները ձեռք բերելու պատճառով, կարող են կիրառվել Թուրքիայի պաշտպանական արդյունաբերության քարտուղարության և դրա ղեկավար Իսմայիլ Դեմիրի դեմ: Ակնկալվում է, որ պատժամիջոցների կիրառման մասին կհայտարարվի մոտ օրերս։