Երթի նպատակը մեկն է՝ «ֆեյքահայաստանի» «վարչապետ» Նիկոլ Փաշինյանին բացատրել, որ ինքն այլևս իշխանություն չունի։ Այս մասին Նիկոլ Փաշինյանի հրաժարականի պահանջով երթի ընթացքում Tert.am-ի հետ զրույցում  ասաց Հայաստանի Հանրապետական կուսակցության երիտասարդական կազմակերպության նախագահ Հայկ Մամիջանյանը։

«Հայաստանում չկա գոնե մի մարդը, որը պատրաստ է, որ իր փոխարեն բանակցի Ալիևի դիմաց «կզած» անձնավորություն, մարդ, ում խայտառակում են Ադրբեջանում, ում հեգնում է Թուրքիայի նախագահը, և նրան 8 ժամ անց պատասխանում է խոսնակի շուրթերով։ Այստեղ հավաքված մարդիկ եկել են ասելու, որ Հայաստանը լինելու է առանց Նիկոլի, լինելու է առանց «կզած» ղեկավարի։ Մենք ենք մեր երկրում լինելու տերը»,-ասաց Մամիջանյանը։

Դիտարկմանը, թե իշխանամետներն այլ պնդումներ են անում, Մամիջանյանն արձագանքեց, թե այժմ երկրում իշխանամետներ չկան, կան դավաճանի կողմնակիցներ, և հայ ազգ։ «Ցանկացած մարդ, որը Նիկոլ Փաշինյանի հետ է կապում Հայաստանի ապագան, նա դավաճանական պլանի մաս է կազմում»,-ասաց նա։

Հիշեցնենք, որ քաղաքացիները Երևանի Կասյան փողոցից «Արժանապատվության երթով» շարժվում են դեպի Ֆրանսիայի հրապարակ։