Փաշինյանի հեռացման բանալին Ծառուկյանի ձեռքին է․ ԱԺ աշխատանքը պետք է պարալիզացվի
Հայաստանում Նիկոլ Փաշինյանի հրաժարականի պահանջով պայքարը, ներառյալ նաեւ փողոցային պայքարը շարունակվում է։ Ընդդիմությունն իհարկե կարողանում է հազարավոր քաղաքացիների հանել փողոց, սակայն այնքան ժամանակ, քանի դեռ գործող իշխանությունն ունի բավարար ոստիկանական ուժեր եւ կարողանում է նաեւ ճնշման ու ահաբեկման գործիքներն օգտագործել, հասկանալի է, որ Փաշինյանը հեշտ կերպով իշխանություն չի հանձնի, գոնե այս փուլում կարծես թե նման մտադրություն չունի էլ։
Նա դեռ կարողանում է ձերբակալություններ եւ կալանավորումներ իրականացնել, ահաբեկել մարդկանց, եւ բացի այդ էլ ձմեռային սեզոն է, ցուրտ եղանակ, եւ մարդիկ ֆիզիկապես տեւական ժամանակ դրսում գտնվելու կամ դուրս գալու խնդիր ունեն։ Իրականում իշխանություններին ճնշելու ոչ պակաս կարեւոր գործիք է նաեւ ԱԺ-ն։
Ու այստեղ հատկապես կարեւորվում է ԱԺ ընդդիմադիր ամենախոշոր խմբակցության՝ «Բարգավաճ Հայաստան»-ի դերը։ Պարզ ասած՝ ԲՀԿ-ական պատգամավորները կարող են պարզապես գրավել ԱԺ ամբիոնը, պարալիզացնել ԱԺ աշխատանքը, այդ կերպ նաեւ թույլ չտալով որպեսզի կառավարությունը կարողանա իր բերած նախագծերը կյանքի կոչել, արտաքին պարտքը մեծացնել, որը հնարավորություն կտա Փաշինյանին, երկիրը պարտքերի մեջ խրելով, պահել իր իշխանությունը։
Զուգահեռաբար, պատգամավորների մակարդակով այդ ակցիաների ընթացքում պետք է հրավիրվեն միջազգային կառույցների եւ առաջատար միջազգային լրատվամիջոցների ներկայացուցիչները։ Եթե ԲՀԿ-ական պատգամավորները այսքանը կարողանան անել, եւ ստիպեն, որպեսզի ԱԺ-ն մատնվի անգործության, իսկ կառավարությունն էլ հայտնվի կոլապսային իրավիճակում, ապա Փաշինյանի վրա ճնշումն անհամեմատ կավելանա ու հրաժարականի գործընթացը կարագանա։
ԱԺ-ում նման կտրուկ գործողությունը կբարձրացնի նաև փողոցի տրամադրությունները ու վստահաբար շատ ավելի քաղաքացիներ դուրս կգան փողոց տեսնելով ընդդիմության վճռականությունը։ Այս ամենում շեշտում ենք ԲՀԿ-ի դերը, որովհետեւ նախ ավելի արմատական են իրենց հայտարարություններում, քան ԼՀԿ-ականները, որոնց դեպքում ամբողջապես հասկանալի չէ, թե ինչ են ուզում եւ հետո, ավելի կայուն եւ ծավալուն ռեսուրսներ ունեն։ Սա եւս քաղաքական պայքարի ձեւ է, որից չպետք է խորշել՝ պարտության սիմվոլին հեռացնելու համար իշխանությունից։
