Այս պահին մի խումբ քաղաքացիներ ակցիա են անում ոստիկանության մոտ:

Ակցիայի ընթացքում «ՎԵՏՕ» շարժման ղեկավար Նարեկ Մալյանի խոսքերով, վերջին օրերին, շաբաթներին, ամիսներին ոստիկաններն իրենց անընդհատ տանում են ոստիկանության բաժիններ. «Մեր և ոստիկանության կապվածությունը հասսել է իր գագաթնակետին:

Դրանից ելնելով՝ այսօր որոշեցինք ինքներս գալ Ոստիկանության կենտրոնական մասնաշենք ու մեզ հուզող որոշ հարցեր հնչեցնել հենց այստեղ»:

«Ի դեպ, սա հենց այն մասնաշենքն է, որտեղ ես ավելի քան 6 տարի աշխատել եմ: Ամեն դեպքում ոստիկան ասելիս՝ ինձ մոտ առաջին ասոցացիան միշտ եղել է արժանապատվության զգացումը»,-ասաց Մալյանը:

Իրավապաշտպան Ռուբեն Մելիքյանն իր հերթին նշեց, որ այսօր ոստիկանության կենտրոնական մասնաշենքի առաջ են հավաքվել. «Մենք ամեն օր մեր բողոքի ձայնն ենք բարձրացնելու, այնքան ժամանակ, քանի դեռ մեր երկրում մեզ ծնկած ենք զգում, քանի որ մեր երկրի ղեկավարը թշնամու առաջ ծնկած մարդ է, այնքան ժամանակ, քանի դեռ մեր երկիրը ղեկավարում է թշնամու առաջ ծնկած, թշնամու ծաղրուծանակին ենթարկվող խմբակ»:

Մելիքյանը նշեց, որ այսօր ոստիկանության մոտ են հավաքվել տարբեր հայացքներ ունեցող մարդկանցով, սակայն ունեն մեկ համոզմունք, որ երկիրը չի կարող ղեկավարել դավաճանը. «Մենք ուղերձ ունենք ոստիկանությանը՝ կապված առանձին ծառայողների վարքագծի հետ:

Օրեր առաջ ես ոստիկաններին հորդորեցի ու խնդրեցի, որ իրենց չպահեն ադրբեջանական շևրոն կրող ոստիկանների նման: Ցավոք, վերջին օրերը ցույց տվեցին, որ այդպիսինները կան, թեկուզ շատ չեն:,

Մենք այսօր մեզ հետ բերել ենք ադրբեջանական շևրոն, որպեսզի հորդորենք, որպեսզի այն, որից ոստիկանների մի մասն իրենց թևին կամ սրտի մեջ ունեն, վերացնեն:

Մենք ՀՀ-ում ենք, ՀՀ քաղաքացիներ ենք: Ոստիկանությունը պարտավոր է մեզ վերաբերվել որպես իրենց հայրենակիցների: Այն առանձին ոստիկանության ծառայողները, ովքեր իրենց ուսերին այս շևրոնն են կրում, այս շևրոնը պատռելով, հորդորում ենք վերացնել անհամաչափ ուժ կիրառելը:

Մարդկանց հարվածում են երբեմն, երեկ տեսանք, որ նույնիսկ հոսպիտալացված մարդ եղավ: Մենք հորդորում ենք խստորեն պահպանել օրենքի պահանջները»:

Մելիքյանի խոսքերով, օրնակ փողոց փակելը, որպես բողոքի ձև, ընդունելի սահմանադրական իրավունք է, առավելագույնը, որը ոստիկանները կարող են անել, ժամանակ տրամադրելն է:

Ավելին՝ ոստիկանները պարտավոր են ապահովել հավաքի անվտանգությունը. «Երկրորդ՝ մենք ոստիկաններին հորդորում ենք հիշել, որ Արամ Մանուկյանի հիմնած կառույցի աշխատակիցներ են:

Մանուկյանը ՀՀ ոստիկանությունն է հիմնել:

Շուշի հանձնողի հրամանները կատարելիս՝ թող հիշեն, որ Արամ Մանուկյանի հիմնած կառույցի սպաներ ու ծառայողներ են»: