Այս պահին մի խումբ քաղաքացիներ ակցիա են իրականացնում Ոստիկանության կենտրոնական մասնաշենքի մոտ:

Նարեկ Սամսոնյանի խոսքերով, ինքը հազարավոր ոստիկանների գիտի, ովքեր իրենց պարտքը կատարում են այնպես, ինչպես Սահմանադրությունն է նախատեսել. «Բայց կան ոստիկաններ, որոնք այս կամ այն կերպ, հետևից խփում են բերման ենթարկելիս, աքացի են տալիս և այլն:

Ես ստանձնել եմ նմանատիպ ոստիկանների ներկայացնելու պատասխանատվությունը:

Օրինակ Կարմիր բերետավորների մեջ կա Միքայել Այվազյան անուն ազգանունով մի կապիտան, որի նկարը ես երեկ հրապարակել եմ: Նա, ըստ առկա տեսանյութերի ու քաղաքացիների պնդմամբ, մարդկանց բերման ենթարկելիս առանձնակի հաճույք է զգում մարդկանց հետևից՝ գլխին, մեջքին, ոտքերին, հարվածելիս:

Նմանատիպ ոստիկանները ծառայում են Ալիևին: Ես գիտեմ, որ նույն ոստիկանի մասով դիմել է նաև Նաիրա Զոհրաբյանը, որպեսզի ծառայողական քննություն իրականացվի: Հուսով եմ, որ ոստիկանությունն ընթացք կտա գործին: Նման մարդը համազգեստի հետ գործ չունի»:

Սամսոնյանը վստահություն հայտնեց, որ Հայաստանի իշխանությունները շուտով հարգելու են ոստիկանենրի ուսադիրները, իսկ այսօր չեն հարգում. «Ես հուսով եմ, որ այդ անխուսափելի գործընթացը շատ շուտ կլինի, ինչի համար դրել եմ իմ ամբողջ ներուժը:

Սիրելի ոստիկաններ, մենք ձեզ շատ հարգում ենք, քանի դեռ դուք հարգում եք օրենքը: Մի փորձեք լինել այնպիսին, ինչպիսին Միքայել Այվազյանն է, հակառակ դեպքում ձեր լուսանկարները ևս կհայտնվեն նրա լուսանկարի կողքին:

Հետևից խփողը տղամարդ չէ, ոչ միայն ոստիկան չէ»: