Փարիզի ոստիկանությունը 24 մարդու է ձերբակալել «Գլոբալ անվտանգության մասին» օրինագծի դեմ բողոքի շաբաթօրյա ցույցի ժամանակ: ТАСС գործակալության փոխանցմամբ՝ այս մասին հայտնել է Ֆրանսիայի ՆԳ նախարար Ժերալդ Դարմանենը:

«Շնորհակալություն ոստիկանության և ժանդարմերիայի աշխատակիցներին, որոնք այսօր մոբիլիզացվել են կարգազանցների դեմ: Փարիզում տեղի ունեցող բողոքի ակցիայի ժամանակ արդեն 24 մարդ է ձերբակալվել, նրանցից ցույցերի ժամանակ արգելվող առարկաներ են առգրավվել»,- Twitter-ում գրել է ֆրանսիացի նախարարը:

Ցուցարարները դեմ են հանդես գալիս նոր օրինագծի 24-րդ հոդվածին, որը գտնվում է խորհրդարանի դիտարկման փուլում: Տվյալ հոդվածը խոշոր չափի տուգանք և ազատազրկում է նախատեսում այն անձանց համար, որոնք համացանցում կտեղադրեն ոստիկանների լուսանկարները, որոնցում հստակ երևում է ոստիկանի դեմքը, ինչպես նաև կհայտնեն նրանց հասցեն կամ ազգանունը:

Անցյալ շաբաթ տեղի ունեցած ցույցերի ընթացքում երկրի ՆԳՆ տվյալներով իրավապահ մարմինների  ավելի քան 70 աշխատակից էր տուժել ցուցարարների հետ բախումների ժամանակ: 95 ցուցարար ձերբակալվել էր: