Հրապարակ-ը գրում է. Քիչ առաջ Երևանի սրճարաններից մեկում նկատեցինք ՊԲ նախկին հրամանատար Սամվել Բաբայանին: Նա մի քանի տղամարդու հետ նստած ընթրում էր: Այս սրճարանում Բաբայանը հաճախ է լինում, անգամ պատերազմի թեժ օրերին, երբ Արցախում կենաց ու մահու մարտեր Էին ընթանում, այդ թվում` Շուշին հանձնելու և կապիտուլյացիայի փաստաթուղթը ստորագրելու օրը՝ երեկոյան Բաբայանն այս սրճարանում է եղել, դրանից հետո նոր գնացել է կառավարություն` Փաշինյանի հետ հանդիպման:

Այսօր ևս նա անվրդով նստած էր սրճարանում, այն դեպքում, երբ այս պահին դարձյալ մարտեր են ընթանում Արցախում. արդեն հայտնի է, որ թշնամին հարձակում է գործել հայկական Հին Թաղեր և Խծաբերդ գյուղերի վրա և գրավել դրանք:

Ուստի, երբ Բաբայանն ավարտեց ընթրիքն ու դուրս եկավ սրճարանից, մոտեցանք նրան և հարցրինք` ի՞նչ կարող է ասել թշնամու նոր հարձակման մասով: Սակայն Սամվել Բաբայանն իրեն ոչ կոռեկտ ու Արցախի հերոսին ոչ վայել պահվածք ցուցաբերեց` կոպիտ տոնով արձագանքելով. «Գնա քնի»: Հետո էլի քթի տակ ինչ-որ անվայելուչ բաներ ասաց:

Տեսանք, որ Արցախի հայկական բնակավայրերի ճակատագիրը Արցախի ՊԲ նախկին հրամանատարին կարծես այնքան էլ չի հետաքրքրում, այլ հարց ուղղեցինք` արդյոք ինքը վարչապետ Նիկոլ Փաշինյանի տիկնոջից բարոյական աջակցություն ստացե՞լ է Արցախում, հրամանատարական բունկերում, ինչի մասին հայտարարել էր ինքը` Փաշինյանը, որ իր տիկին Աննա Հակոբյանը Արցախ էր մեկնել ոչ թե հրամանատարների գործերին խառնվելու, այլ բանակի սպաներին բարոյական և հոգեբանական աջակցություն ցուցաբերելու:

Բաբայանը, սակայն, մեր հարցը լսելուց հետո քթի տակ էլի ինչ-որ բաներ մրմնջաց և նստեց իր գոլդ համարներով թանկարժեք BMW X7-ն ու հեռացավ:

Մանրամասները՝ տեսանյութում