Նյու Յորքի նահանգապետ Էնդրյու Կուոմոյի տնտեսական զարգացման հարցերով նախկին օգնական, Մանհեթենի շրջանի ղեկավարի ներկայիս թեկնածու 36-ամյա Լինդսի Բոյլանը մեղադրել է նահանգապետին սեռական ոտնձգության համար, հայտնում է The wall Street Journal –ը:

«Նա հետապնդել է ինձ տարիներով: Դա շատերն են տեսել: Ես երբեք չեմ իմացել ինչ ակնկալել՝ արդյոք ինձ վա՞տ կվերաբերվեն, թե՞ աշխատանքս կկորցնեմ» - գրել է Բոյլանն իր թվիթերյան էջում: Ավելի ուշ թեկնածուն գրառում է կատարել որում նշել է, որ այդ մասին լրագրողների հարցերին չի պատասխանելու:

Նահանգապետի մամուլի խոսնակ Քեյթլին Ջիուարդը հերքել է այս տեղեկությունը՝ նշելով, որ դա իրականությանը չի համապատասխանում: Նա նշել է, որ Բոյլանը նահանգապետի դեմ ոչ մի պաշտոնական բողոք չի ներկայացրել այն ընթացքում, քանի դեռ պետական աշխատող էր:

Համաձայն Լինդսի Բոյլանի ԼինքդԻնի անձնական տվյալների՝ 2015-2018 թվականներին նա աշխատել է Empire State Development նահանգային տնտեսական զարգացման մարմնում, ապա տեղափոխվել է նահանգապետի գրասենյակ  և աշխատել այնտեղ 2018 թվականի մարտ-հոկտեմբեր ամիսներին:

Ամսագիրը նշում է, որ Նյու Յորքի նահանգապետ Էնդրյու Կուոմոյի վարկանիշն աճել է հատկապես կորոնավիրուսային համաճարակի դեմ պայքարում ցուցաբերած արդյունքերի շնորհիվ: Նորընտիր նախագահ Ջո Բայդենի վարչակազմում նա դիտարկվում է ԱՄՆ-ի Գլխավոր դատախազի թեկնածու, պարբերականին հայտնել են հավաստի աղբյուրները: