ԱՄՆ գործող նախագահ Դոնալդ Թրամփը քայլեր չի ձեռնարկում պետության ղեկավարի ընտրությունների արդյունքների հրապարակային ճանաչման ուղղությամբ, որոնց համաձայն հաղթանակ է տարել նախկին փոխնախագահ, դեմոկրատ Ջո Բայդենը, հաղորդում է CNN հեռուստաընկերությունը:

Հեռուստաընկերության աղբյուրի խոսքով՝ Թրամփը չի պատրաստվում հրապարակայնորեն ընդունել իր պարտությունը նույնիսկ այն պարագայում, երբ երկուշաբթի ընտրիչների կոլեգիայի անդամները հաստատել են երկրում քվեարկության արդյունքները: Ընդ որում, ինչպես նշում Է CNN-ը, իր օգնականների հետ անձնական զրույցներում Թրամփը նշել է, որ երկրորդ ժամկետում չի պաշտոնավարի՝ չնայած ընտրությունների արդյունքները վիճարկելու նրա ձեռնարկած փորձերին:

Հիշեցնենք, որ նախօրեին ԱՄՆ-ում ընտրիչների քվեարկությունը հաստատել է երկրի նախագահի պաշտոնի համար անցկացված նախագահական ընտրությունների արդյունքներով դեմոկրատ Ջո Բայդենի տարած հաղթանակը։

Բայդենը ստացել է Կալիֆոռնիա նահանգի 55 ընտրիչների բոլոր ձայները՝ հավաքելով ավելի քան 270 ձայն, որն անհրաժեշտ է ԱՄՆ նախագահ դառնալու համար: Ընդհանուր 538 ձայներից դեմոկրատը ստացել է 302-ը, իսկ գործող նախագահ Դոնալդ Թրամփը՝ 232:

Ընտրիչների քվեարկությունը ընտրությունների արդյունքները պաշտոնական են դարձնում, սակայն վերջնական դրանք կդառնան հունվարի 6-ին, երբ Կոնգրեսի համատեղ նիստը կհաստատի դրանք: