Դեկտեմբերի 14-ին կայացած ընտրիչների քվեարկությունը հաստատել է ԱՄՆ նախագահի պաշտոնում Ջո Բայդենի հաղթանակը։ Անհրաժեշտ էր ընտրիչի 270 ձայն, մինչդեռ Բայդենը ստացել է 306-ը, իսկ Թրամփը՝ 232-ը։

Բոլոր նահանգներում, որտեղ գործող նախագահը վիճարկել է Բայդենի հաղթանակը, ընտրիչների բոլոր ձայները եղել են դեմոկրատի օգտին։

Ընտրիչների քվեարկությունն ընտրությունների արդյունքները դարձնում է պաշտոնական, սակայն դրանք վերջնական կդառնան հունվարի 6-ին, երբ Կոնգրեսի համատեղ նստաշրջանը հաստատի արդյունքները։

Բայդենն ընտրիչների քվեարկությունն անվանել է Թրամփի նկատմամբ ակնհայտ հաղթանակ։ Դելավերում ելույթի ժամանակ նա կոչ է արել Թրամփին հարգել քվեարկության արդյունքները, դատապարտել է «հարձակումներն» ընտրությունների արդյունքների վրա։ Բայդենը նշել է, որ ընտրական հանձնաժողովների աշխատակիցները ենթարկվել են սպառնալիքների։