Արդեն առիթն ունեցել ենք գրելու, որ Երեւանում տեղի ունեցավ հակառուսականությամբ բուրող քաղաքական ակցիա եւ երթ՝ հայտնի խմբակի կողմից, ամենայն հավանականությամբ՝ Նիկոլ Փաշինյանի «քավորությամբ»։ Ընդհանրապես, բավական հետաքրքիր տենդենց է նկատվում։ Որքան ավելանում են ռուսների ջանքերը, այնքան ավելի կատաղում են հայտնի սորոսական շրջանակները Հայաստանում եւ փորձում ամեն կերպ հակառուսականություն տարածել։ Հասկանալի է, սորոսականների համար ամեն ինչ, որ կապված է ռուսների հետ մերժելի է։ Սակայն, որ նրանք այս աստիճան կարող են ինքնակորուսված վիճակում «նետել մարտի» արդեն ում պատահի, նույնիսկ ծիծաղելի է։ Հերթական հակառուսական դրսեւորումը Արցախի ԱԽ նախկին քարտուղար, Արցախի նախկին հերոս Սամվել Բաբայանի հայտարարությունն էր։

«Մերոնք» հաղորդման ընթացքում Սամվել Բաբայնաը հայտարարեց, որ սուտ են այն խոսակցությունները, թե Հայաստանը զենքի խնդիր չի ունեցել և Ռուսաստանը տվել է այն ինչ մենք ուզում էինք եւ ավելին, Ռուսաստանը մեզ նորմալ զենք չի տվել։ Այս հայտարարությունը սորոսականները ցիտում են նախանձելի ջանասիրությամբ ու փորձում այս հայտարարությամբ ինչ-ինչ տրամադրություններ ստեղծել, ինչը հատկապես ծիծաղելի է դառնում՝ երեկ գերիների առաջին խմբի վերադարձից հետո։ Նախ, զավեշտալի էր այս հայտարարությունը հենց Սամվել Բաբայանի կողմից հնչեցնելը։ Բաբայանը ոչ վաղ անցյալում ռուսական մամուլին տված իր հարցազրույցներում խոսում էր այն մասին, որ Ղարաբաղյան հարցի միակ ողջամիտ լուծումը ռուսական պրոտեկտորատի տակ անցնելն է կամ նման մի բան։

Բարձրաստիճան զինվորականի կողմից համոզմունքների նման արագ ու կունյուկտիվ փոփոխությունը ամենեւին չի պատիվ բերում նրան, այլ կարող է վկայել նրա հեղհեղուկության եւ իրավիճակայնության մասին, ինչը չափազանց նեգատիվ կարող է համարվել որպես բնութագրիչ հատկանիշ մի մարդու համար, ով անցել է Արցախյան պատերազմ։ Ստացվում է, որ մենք գործ ունենք ոչ այնքան կամային եւ կայուն մարդու հետ։ Սակայն չմոռանանք, որ Արցախում նախագահական ընտրությունների հետ կապված քաղաքական թոհուբոհի մեջ հայտնի դարձավ, որ Սամվել Բաբայանի մուտքը Ռուսաստան արգելված է, քանի որ նա ունի կապեր սորոսականների հետ։ Հանրագումարում ունենում ենք բավական հետաքրքիր պատկեր, երբ կարող ենք նույնիսկ խոսել ընդհանրապես Բաբայանի՝ իր ընտրողների հանդեպ ունեցած անկեղծության դեֆիցիտի մասին։

Հետաքրքիր է՝ հակառուսական տրամադրություններ սերմանելու գործին լծվելը Բաբայան Սամվելը որոշել է անել Նիկոլ Փաշինյանի տիկնոջ՝ Աննա Հակոբյանի՝ իրեն բարոյական աջակցություն ցուցաբերելուց առաջ, թե՝ հետո, կամ գուցե Աննա Հակոբյանի կողմից ցուցաբերած բարոյական աջակցության ազդեցությամբ է դեռ երեկ Արցախի ապագան ռուսական պրոտեկտորատի տակ տեսնող Սամվել Բաբայանը որոշել հերքել ՌԴ նախագահ Վլադիմիր Պուտինի հայտարարությունը, որ Հայաստանը ռազմատեխնիկական աջակցությունը պատերազմի ժամանակ ստացել է ամբողջապես։

Ի դեպ, արցախցի արեւմտամետ Հայկ Խանումյանն էլ կարծես թե ձեռքերը ծալած չի նստում եւ սկսել է հակառուսականության օջախ ստեղծել բուն Արցախում, ինչը նույնպես վտանգավոր է։