Լեռնային Ղարաբաղում ռուսական խաղաղապահ զորախմբի զինծառայողները Մարտակերտ քաղաք են հասցրել սննդի եւ առաջին անհրաժեշտության իրերի հումանիտար փաթեթներ: Այս մասին հայտնում է ՌԴ Պաշտպանության նախարարությունը:

Սննդամթերքի փաթեթները եւ առաջին անհրաժեշտության իրերը փոխանցվել են փախստականներին, ովքեր վերադարձել են իրենց տները եւ բնակավայրի այլ կարիքավոր բնակիչներին:

Մի քանի հարյուր ընտանիքներ ստացել են մարդասիրական փաթեթներ, որոնք պարունակում են սնունդ եւ առաջին անհրաժեշտության իրեր:

Ռազմական գործողություններից տուժած Լեռնային Ղարաբաղի շրջաններում ռուս խաղաղապահների օժանդակությամբ շարունակվում է կենսական կարեւորության ենթակառուցվածքային օբյեկտների վերականգնումը:

«Ավարտվել են Շուշիի արեւմտյան ծայրամասում էլեկտրահաղորդման գծերի վերանորոգման աշխատանքները: Ապահովվել է էլեկտրաէներգիայի անխափան մատակարարումը 24 բնակավայրերին, որտեղ ապրում է ավելի քան 10 հազար մարդ», - նշված է հաղորդագրության մեջ:

Ռուսաստանի պաշտպանության նախարարության բժշկական ջոկատների մասնագետները Ստեփանակերտում եւ Մարդակերտում շարունակում են բժշկական օգնություն ցուցաբերել բնակչությանը:

Հիմնականում ռուս ռազմական բժիշկներին դիմում են քրոնիկական հիվանդություններով տառապող տեղի բնակիչները, ովքեր հակամարտության սրման ընթացքում զրկվել են որակյալ բժշկական օգնություն եւ անհրաժեշտ դեղեր ստանալու հնարավորությունից:

Ընդհանուր առմամբ, ռուս ռազմական բժիշկները բժշկական օգնություն են ցուցաբերել 529 քաղաքացիների, այդ թվում՝ 63 երեխաների: