Արցախի նախագահ Արայիկ Հարությունյանը շատ ավելի պատեհ պահեր է ունեցել բացահայտելու այն ողջ դավադրությունը, որը կատարվել է հայ ժողովրդի նկատմամբ և հիմա ժամանակը չէ աղիողորմ և լալահառաչ տեսարաններ բեմադրելու առ այն, որ ես ազդեցություն չունեի. Նիկոլ Փաշինյանի հրաժարականի պահանջով «Արժանապատվության» երթի ժամանակ նշեց «Իրավական կրթություն և վերահսկողություն» ՀԿ նախագահ Արփինե Հովհաննիսյանը։

Հիշեցնենք, որ Արայիկ Հարությունյանն այսօր ուղերձ էր հղել, որում նշվում է, որ Պաշտպանության բանակը կառավարվում է Գերագույն գլխավոր հրամանատարի կողմից և գաղտնիք չէ, թե որքանով է Արցախի Հանրապետության նախագահը ընդգրկված այդ գործընթացներում:

Ըստ նրա, եթե Արայիկ Հարությունյանը պատերազմի ժամանակ ազդեցություն չուներ, պետք է բարձրաձայն ասեր այդ մասին, հնարավոր է, որ դա էր պատճառը, որ Հայաստանը գնաց համապարփակ պարտության:

Հարցին, թե հասկանալի է արդյո՞ք ձեզ համար, թե ինչո՞ւ է Վիտալի Բալասանյանը համաձայնում, որ հետպատերազմյան պատասխանատվությունը իր ուսերին ընկնի, Արփինե Հովհաննիսյանը նշեց, որ Վիտալի Բալասանյանի մոտիվները տարբեր կարող են լինել, բայց հաշվի առնելով այն հանգամանքը, որ տեխնիկական պատճառներով Արայիկ Հարությունյանը դեռ Արցախի  նախագահ է, Վիտալի Բալասանյանը փորձում է որոշակի առումով իր լուման ներդնել Արցախի մնացորդների փրկության հարցում: