«Նիկոլը 2,5 տարի շարունակ քանդել է պետության հիմքերը: Սա չեմ ասում նրա համար, որ ուզում եմ վերադառնալ իշխանության: Ինքս իշխանության վերադառնալու ցանկություն չունեմ, իմ նպատակն է այս հողատուին հեռացնել իշխանությունից, որ փրկենք ՀՀ-ն»,-ասաց նա:

Շարմազանովն ընդգծեց՝ Նիկոլ Փաշինյանի հեռացումից հետո վարչապետը չպետք է նրա թիմից լինի:

«Նիկոլ Փաշինյանի քաղաքական պատասխանատվության ձևը օր առաջ հրաժարական տալն է: Նա պետք է հեռանա, նրա որևէ կամակատար չպետք է դառնա ՀՀ գործադիր իշխանության ղեկավար: Այսօր ՀՀ-ում անիշխանություն է: Քաոսը բերում է ինքը՝ ամեն մի օր թվացյալ իշխանության մեջ մնալով: Բոլորը, ովքեր պաշտպանում են Նիկոլ Փաշինյանին, դավաճանական գործողության, հողատվության մաս են կազմում: «Իմ քայլը»-ից որևէ մեկը չպետք է դառնա վարչապետ»,-ասաց նա:

Անդրադառնալով ԱՀ նախագահ Արայիկ Հարությունյանի հայտարարությանը, թե պատրաստ է աջակցել՝ պարզելու պատերազմի ընթացքում եղած հնարավոր դավաճանական գործողությունները, Շարմազանովն ասաց, որ իշխանափոխությունից հետո բոլորն էլ պետք է ցուցմունքներ տան և ենթարկվեն համապատասխան գործողությունների:

«Իշխանափոխությունից հետո կլինի նաև իրավական գործընթաց, ես համոզված եմ, որ ոչ միայն նա, այլև Հայաստանի ու Արցախի իշխանության բազմաթիվ ներկայացուցիչներ պետք է ասեն այն, ինչ եղել է: Հայ ժողովրդի նկատմամբ եղել է դավադրություն ու դավաճանություն»,-ասաց նա:

«Տեղի է ունեցել դավաճանություն իմ հայրենիքի ու ժողովրդի նկատմամբ, ստորագրվել է կապիտուլյացիայի ակտ, որի միակ պատասխանատուն ու մեղավորը հողատու Նիկոլն է, ուստի պետք է լինեն իրավական գործողություններ, և մեղավորները պատասխան տան: Իմ սուբյեկտիվ կարծիքով՝ Նիկոլ Փաշինյանի գործողություններում կան հանցավոր անգործության ու հանցավոր դավադրության գործոններ ՀՀ-ի, ԱՀ-ի և հայ ժողովրդի նկատմամբ»,-ասաց նա՝ նշելով նաև, թե ընդդիմությունը ժողովրդի հետ միասին գործելու է օրինական միջոցներով ու դրանցով է պարտադրելու Փաշինյանի հրաժարականը:

Շարմազանովը նշեց, թե կարևոր հարցեր կան՝ ինչո՞ւ եղավ պատերազմը, ինչո՞ւ Նիկոլը հրահրեց պատերազմ, և ինչո՞ւ դրա 44 օրերին դավադիր կերպով տարավ պատերազմի ու չլսեց ՀՀ գլխավոր դաշնակցի ղեկավարի՝ դեռևս հոկտեմբերին արված առաջարկը՝ դադարեցնել պատերազմը: