Լրագրողները երեկ հարցում էին ուղարկել Կառավարություն՝ պարզելու, թե ով է ժողովուրդը և քանի քաղաքացին է համարվում ժողովուրդ, Նիկոլ Փաշինյան՝  ահա այսքան ժողովուրդը քեզ համար ժողովո՞ւրդ է, թե ոչ: Եվ Նիկոլ Փաշինյանը պատասխանել էր՝ ինձ 30 օր ժամանակ է պետք  հասկանալու համար՝ դուք ժողովո՞ւրդ եք, թե՞ ոչ: Ես վստահ եմ, որ Կառավարության կողմից ուղարկված պատասխանը գրել է Նիկոլ Փաշինյանը, որովհետև այդքան անպատասխանատու կարող էր լինել Նիկոլը. այսօր իրականացված «Արժանապատվության երթի» ժամանակ նշեց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը:

«Դուք հասկանո՞ւմ եք, մարդը ունի ժողովրդի իր պատկերացումը, Նիկոլի համար ժողովուրդը նա է, ով «ֆեյք»-ի անվան տակ նստած գրում է՝ «Նիկոլ վարչապետ»։ Նիկոլի համար հրաժարական պահանջողները ժողովուրդ չեն և ասում է՝ 30 օր ժամանակ է պետք՝ ճշգրտումներ կատարելու համար»,– ասաց նա:

«Նիկոլ Փաշինյանը հրաժարվում է հասկանալ, թե ինքը ի՞նչ է արել, ասում է՝  ես ի՞նչ եմ արել, նույն բանը ասել է երեկ՝ իր խմբակցության հետ հանդիպման ժամանակ: Նիկոլ, դու բան չես արել, դու ծախել ես հայրենիքը, դու թուրքի նամազին ես հանձնել մեր եկեղեցիները, դու ստիպել ես, որ հայը արցունքն աչքերին վառի իր տունը, որ թուրքի բաժին չդառնա, դու հանձնել ես Արցախը, և թուրքը հիմա ջարդում է մեր մշակութային կոթողները»,– նշեց պատգամավորը: