Ազգային անվտանգության ծառայության հարգելի աշխատակիցներ, թող զարմանալի չթվա, բայց մեր այս պայքարը՝ արժանապատվության երթը եւ վերջնաարդյունք Նիկոլ Փաշինյանի հեռացումը նաեւ ձեր պաշտպանությանն է միտված: Այս մասին այսօր՝ դեկտեմբերի 16-ին, «Արժանապատվության երթի» ընթացքում հայտարարեց քաղաքագետ Անդրանիկ Թեւանյանը:

«Հայաստանի որեւէ կառույց այդպիսի թրքաբարո ասպատակության չի ենթարկվել, ինչպես Ազգային անվտանգության ծառայությունը: Այսպես կոչված թավշյա հեղափոխությունից հետո 5 տնօրեն է փոխվել այս կառույցի։ 5-ից 2-ը հրապարակավ, ուղիղ կամ անուղղակի ձեւով հայտարարել են, որ Նիկոլ Փաշինյանը հոգեկան հիվանդ է, նրանք մի փոքր այլ բառեր են օգտագործել, սպային պատիվ բերող բառեր են օգտագործել, բայց ժողովրդին կոչ են արել ազատվել այս գժից: Հիշեցնեմ, որ ԱԱԾ նախկին տնօրենը հայտարարել է նաեւ, որ Նիկոլ Փաշինյանը ապօրինի հրաման է տվել կալանավորել Վազգեն Մանուկյանին, ինչին ինքը դեմ է եղել:

Իսկ ինչո՞ւ էին ուզում կալանավորել, որովհետեւ Վազգեն Մանուկյանը այն մարդկանցից էր, ով պատերազմի օրերին, տիրապետելով ամբողջ ինֆորմացիային, հայտարարում էր, որ պետք է ձերբազատվել Նիկոլ Փաշինյանից, իշխանությունը հանձնել զինվորականությանը, որպեսզի մենք այդ խայտառակ կապիտուլյացիայի չենթարկվեինք: Ցավոք սրտի, դա տեղի չունեցավ պատերազմի օրերին, եւ ուրեմն այս ամենից հետո ԱԱԾ-ը ծառայակիցները մեր թիվ մեկ դաշնակիցներն են, որովհետեւ նրանք ամենաինֆորմացվածն են եւ գիտեն, որ գժերին չի կարելի թողնել իշխանության ղեկին»,- նշեց նա: