Հայաստանի նախկին ոստիկանապետ, գեներալ գնդապետ Վլադիմիր Գասպարյանը 5-րդ ալիք հեռուստաընկերության «Հարցազրույցի» տաղավարում, անդրադառնալով Ղարաբաղյան երկրորդ պատերազմի արդյունքներին, հայտարարել է, որ մենք ազգովի ենք ելել պատերազմի եւ չի պարտվել, պարտվողը եղել է ռազմաքաղաքական ղեկավարությունը․«Հայ զինվորը չի պարտվել, ինչը անվիճելի փաստ է։ Հայ զինվորը գիտի կռվել ու ունի հոգի, սակայն տեղի ունեցավ այն, ինչը պետք է տեղի ունենար»։

Վլադիմիր Գասպարյանը վերհիշելով պատերազմի օրերին իր այցը Արցախ, նկատեց, որ ինքը արձանագրել էր իր համար, որ խնդիր կա բանակի կառավարման հետ կապված։ Գասպարյանը հիշեց, որ Ազատամարտիկների միությունում ինքը տեսել է գեներալներին, արցախյան ազատամարտում իրապես վաստակ ունեցողներին եւ նրանց դեմքերին կարդացել է մտահոգություն եւ վիրավորվածություն։

Ու նույնիսկ այդ հեղհեղուկ իրավիճակում անում էին այն, ինչր հնարավոր էր, օգնում էին այնտեղ, որտեղ դրա կարիքը կար։ Գեներալ Գասպարյանը ընդգծեց, եթե դավաճանություն չլիներ, հող չէր հանձնվելու Նա շեշտեց՝ որ սա իր երկիրն է, իր ժողովուրդն է ու շուտով պատասխան են տալու նրանք, ովքեր հաղթանակածներից պարտվածներ սարքեցին։ Հայաստանի նախկին ոստիկանապետն անդրադարձել է նաեւ հայաստանյան քաղաքական ներկա օրակարգին, առկա խնդիրներին։