Երեկ երեկոյան քննարկման արդյունքում ինձ տեղեկացրին մարզպետ նշանակալու մասին, իսկ մինչ այդ՝ մանդատը դնելիս, չգիտեի: Այս մասին կառավարության հերթական նիստից հետո ասաց Լոռու նորանշանակ մարզպետ Արամ Խաչատրյանը:

Դիտարկմանը, որ մամուլը գրել է, որ նրա մերձակա շրջանակից ցրել են հակաիշխանական ցույցերը և դրա համար խոստացել են նշանակել մարզպետ, նա ասաց, որ նման բան տեղի չի ունեցել: «Բայց ով է ասում, որ իրենք ցրել են, ոչ մի սադրանք էլ չեն եղել, այնտեղ մարդիկ հավաքվել և աջակցել են վարչապետին»,-ասաց նա:

Արամ Խաչատրյանը նշեց, որ մեծ մասը չեն պահանջում Փաշինյանի հրաժարականը: «Վարչապետի հրաժարականը պահանջողներն ընդամենը 15-20 հոգի են եղել Լոռիում, տեսախցիկներով պարզ ֆիքսել եմ»,-ասաց նա և նշեց, որ Երևանում էլ Փաշինյանի հրաժարականը, ըստ նրա, պահանջողները մոտավոր 500 հոգի են:

«Այս իրավիճակը նման է այն բանին, երբ մեկ պաշտպանողական նռնակի օղակը հանում ես և չորս վայրկյան հետո տրաքում է, չորրորդ վայրկյանին բերեցին տվեցին այս իշխանությանը»,-ասաց նա:

Արամ Խաչատրյանը նշեց, որ իր օրակարգում արտահերթ ընտրություններ անցկացնելու հարց չկա: «Ժողովրդի մեծամասնությունն այսօր աջակցում է Նիկոլ Փաշինյանին, ինչը ակնհայտ երևում է, քանի որ ժողովուրդը շատ լավ հասկանում է, թե ինչ է տեղի ունեցել: Ժողովուրդն այսօր փողոց դուրս չի գալիս այնքան, որքան պետք է, մարդիկ վստահում են կառավարությանը, վարչապետին, ես դա տեսնում եմ մարդկանց հետ շփումներում»,-ասաց նա և վստահություն հայտնեց, որ մեկ շաբաթ, կամ մեկ ամիս հետո Նիկոլ Փաշինյանը հրաժարական չի տա, քանի որ, ըստ մարզպետի, այդպես է ցանկանում ժողովուրդը:

 «Ես տասը տարի պայքարել եմ նախորդ իշխանության դեմ և շատ դեպքերում նույնպես հնարավորություն եմ ունեցել իմ բարեկեցությունը ապահովել, բայց ես այդ ճանապարհը չեմ ընտրել»,-հավելեց նա: